Émile Rousseau

Émile Rousseau

Biografía
Nacemento	(fr) Émile Roger Rousseau 2 de agosto de 1927 6º distrito de París, Francia
Morte	21 de xaneiro de 2010 (82 anos) 10º distrito de París, Francia
Cargos
Gravador xeral de moedas de Francia
Período	1974 – 1994
Antecesor	Raymond Joly
Sucesor	Pierre Rodier
Datos persoais
Educación	Escola Nacional Superior de Belas Artes
Actividade
Ocupación	medallista, gravador
Premios
Cabaleiro da Lexión de Honra  officier de l'ordre national du Mérite  cabaleiro da orde das Artes e as Letras

Émile Roger Rousseau, nado en París o 2 de agosto de 1927 e finado na mesma cidade o 21 de xaneiro de 2010, foi un medallista e deseñador de moedas francés, o vixésimo quinto en ocupar o posto de gravador xeral de moedas de Francia.

Traxectoria

Primeiros anos e formación

Emile Rousseau, o menor de tres irmáns, amosou desde neno os seus dotes para o debuxo e a creación artística, que os seus pais incentivaron ao favorecer a súa formación en debuxo a partir dos seus 11 anos.^[1][2][3]

Con 14 anos, en 1941, aprobou o acceso á École Boulle, onde se iniciou no gravado na sección de aceiro. En 1945 ingresou na Escola Nacional Superior de Belas Artes de París e incorporouse ao obradoiro de gravado de Henri Dropsy.^{[1][2][3][4][5]}

Antes da Monnaie de Paris

En 1954 acadou o segundo posto no Premio de Roma e pasou seis meses na Casa de Velázquez de Madrid, onde se distinguiu con senllas obras en ferro fundido, unha sobre El Greco e a outra sobre a Semana Santa de Sevilla.^[1][2][3]

En 1957 logrou o primeiro lugar no Premio de Roma de gravado de coa medalla La Renaissance d'Eve.^[1][3][6][7] Grazas á consecución do Premio de Roma, Rousseau puido acceder a unha estadía formativa de tres anos en Villa Medici, Roma, que aproveitou tamén para viaxar por toda Italia e por Grecia.^[2]

En 1962, instalou o seu estudio en París, onde traballou como artista independente, que trasladou a unha zona máis céntrica en 1968. En 1963 expuxo 14 obras na Galerie Dauphine e en 1964 participou na exposición dedicada á medalla de España no Museo da Monnaie de Paris.^[1][3]

Gravador Xeral de Moedas de Francia

O 1 de abril de 1974, Rousseau foi nomeado Gravador Xeral de Moedas de Francia por Valery Giscard D'Estaing, que daquela era Ministro de Economía e Facenda,^[1] e adoptou o característico deseño dun golfiño como marca privada de gravador.^[2] Durante o exercicio do seu cargo na Monnaie de Paris creou diversas moedas francesas, entre elas a dun franco De Gaulle, a de 10 francos Gambetta, a de 2 francos Jean Moulin, e tamén unha moeda de 100 francos para o Principado de Mónaco, a nome de Rainiero III.^[8] Tamén foi o autor de medallas,^[9] algunhas delas dedicadas a personalidades como Marguerite Yourcenar, o xeneral De Gaulle ou Jean Moulin, e gravou tamén as espadas de académicos para o Instituto de Francia.^[1][10]

100 francos de Mónaco a nome de Rainiero III (1989).^[11]

O seu cargo implicaba tamén a dirección do obradoiro de gravado da Monnaie de Paris, e durante esas dúas décadas acompañou a máis de trinta gravadores de medallas a acadaren os seus logros artísticos.^[1][2]

Coa súa xubilación en 1994 cesou a súa vinculación coa Monnaie de Paris e foi sucedido por Pierre Rodier no cargo de Gravador Xeral de Moedas.^[1][12]

Derradeira etapa

Xa xubilado, pasou en París durante os meses de inverno, onde mantivo unha intensa vida social e cultural, e os veráns nunha casa con xardín que adquiriu na Borgoña, onde seguiu a desenvolver a súa creación artística.^[1]

Émile Rousseau recibiu varias distincións, entre elas a de Cabaleiro da Lexión de Honra en 1986, a de Oficial do Mérito Nacional en 1992 e a de Cabaleiro das Artes e das Letras.^{[1][3][12][13]}

Rousseau faleceu en París o 21 de xaneiro de 2010.^[1][3][12]

Escolma de traballos

• 
  Vœux d'espérance (1974)
  Medalla de bronce ouro.
• 
  10 francos Gambetta (1982).^[14]
• 
  5 francos Mendès France (1992).^[15]
• 
  20 francos Jean Moulin (1993).^[16]>
• 
  1 franco De Gaulle (1988).^[17]

Notas

1. "Biographie: Émile Rousseau". Emile-rousseau.fr
2. "Portrait: Emile Rousseau". Páxina 35.
3. Darnis, J-M. (2010).
4. "Écoles et travaux". Emile-rousseau.fr
5. "Listes des anciens élèves et promotions de l’école Boulle depuis sa création en 1886". Nicolas-salagnac.com
6. "Portrait: Emile Rousseau". Páxinas 35, 37.
7. "Grd prix de Rome". Emile-rousseau.fr
8. "Les monnaies". Emile-rousseau.fr
9. "Les médailles". Emile-rousseau.fr
10. "Graveur général à la Monnaie de Paris". Emile-rousseau.fr
11. "100 francs Rainier III 40ème anniversaire de règne". Numista.com
12. "Portrait: Emile Rousseau". Páxina 36.
13. "Prix monétaires et distinctions". Emile-rousseau.fr
14. "10 francs Gambetta". Fr.numista.com
15. "5 francs Mendès France". Fr.numista.com
16. "2 francs Jean Moulin". Fr.numista.com
17. "1 franc De Gaulle Nickel". Fr.numista.com

Véxase tamén

Bibliografía

• Darnis, J-M. (2010). "In memoriam Émile Rousseau". En Bulletin numismatique. Nº 76. Abril. Páxina 6.
• "Portrait: Emile Rousseau". En 10^e Salon Numismatique Toulouse-Aucamville. Marzo de 2022. Páxinas 35-44.

Outros artigos

• Gravador xeral de moedas de Francia
• Monnaie de Paris

Predecesor: Raymond Joly

Gravador xeral de moedas de Francia 1974 - 1794

Sucesor: Pierre Rodier