PROFILBARU.COM

Península do Labrador
	(en) Labrador Peninsula
Tipo	península
Epónimo	João Fernandes Lavrador (pt)
Parte de	América do Norte
Localización
División administrativa	Terra Nova e Labrador, Canadá e Quebec, Canadá
	55°N 69°O / 55, -69
Bañado por	Baía de James, Estreito de Hudson, Mar do Labrador, Golfo de San Lourenzo, Baía de Hudson e Océano Atlántico
Características
Superficie	1.400.000 km²

Para outras páxinas con títulos homónimos véxase: Labrador (homónimos).

A península do Labrador (en inglés Labrador Peninsula; en francés Péninsule du Labrador) é unha gran península do nordeste do Canadá, entre o océano Atlántico ao leste e a baía de Hudson ao oeste; ao norte ten o estreito de Hudson, que a separa da Terra de Baffin, ao leste o mar do Labrador e ao suroeste encóntrase o golfo de San Lourenzo.

Xeoloxicamente, a península do Labrador pertence ao Escudo Canadense. Os montes Torngat, que a atravesan de norte a sur, constitúen a súa espiña dorsal. As súas costas son moi accidentadas, con gran cantidade de baías, enseadas, rías e fiordes baixos formados pola erosión glaciaria e os movementos do inlandsis que cubriu o territorio durante as glaciacións. Estas mesmas glaciacións (como na maior parte do Canadá) deixaron así mesmo numerosos lagos. Entre os lagos desta zona do Canadá cabe mencionar os de Clearwater e o Minto. Entre as baías destaca a baía Ungava, no norte da gran península, mentres que pode considerarse un fiorde moi estendido o val no que se localizan a baía Groswater e o lago Melville, na costa occidental.

O seu clima é extremadamente continental no sur, e contra o norte é subártico; a costa leste recibe a influencia da corrente fría do Labrador, o que practicamente anula os efectos moderadores do océano.

Varios son os ríos que percorren esta península: Churchill, Eastmain, George, Koksoak e Leaf.

A península do Labrador ten unha importante subpenínsula na súa parte noroccidental, a península de Ungava, delimitada pola baía Hudson, o estreito de Hudson e a baía Ungava.

Administrativamente, comprende partes das provincias de Terra Nova e Labrador (rexión do Labrador, ou "Costa do Labrador") e Quebec (rexións de Saguenay-Lac-Saint-Jean, Côte-Nord e Nord-du-Québec).