O Instituto de Ensino Secundario Monte Castelo é un centro educativo público situado en Burela (Lugo). Imparte ensino de educación secundaria obrigatoria (ESO), bacharelato e ciclos formativos de grao medio e superior. Ademais, conta cunha sección da EOI de Viveiro, o programa CUALE e Aula Mentor.
Depende da Consellería de Educación da Xunta de Galicia. Sitúase entre o centro adscrito, CEIP Vista Alegre, e o IES Perdouro.
Ensinanzas
O centro imparte educación secundaria obrigatoria a adolescentes e a súa equivalente para persoas adultas (ESA) na modalidade presencial. En canto ao bacharelato, impárteo nas súas tres modalidades: Artes Plásticas (o único centro da comarca da Mariña que o imparte),[2] Ciencias e Tecnoloxía, e Humanidades e Ciencias Sociais; na modalidade para persoas adultas, impártese os anos que hai alumnado. En canto aos ciclos formativos, o centro imparte o ciclo de grao medio en Coidados Auxiliares de Enfermaría e o ciclo de grao superior en Ensinanza e Animación Sociodeportiva. En cursos anteriores impartiuse o extinguido Ciclo Superior de Química e Saúde Ambiental.
A maiores, a oferta do centro complétase cunha sección da Escola Oficial de Idiomas Luz Pozo Garza de Viveiro que imparte todos os niveis de inglés (dende A1 a C2).
Proxectos
Entre os proxectos nos que participa o centro, están:
- O programa Erasmus.[3]
- Intercambios con outros centros, como o CEIP de San Román.[4][5]
- Actividades de prevención do consumo de drogas.[6]
- Actividades de promoción do deporte.[7]
- A montaxe Non cales. Fala, realizada por 1º de bacharelato, que gañou o segundo premio na modalidade audiovisual da Concellería de Promoción do Emprego e Igualdade con motivo do 25-N.[8]
Notas
