A estación de Ávila é unha estación de tren de Adif situada na cidade de Ávila, en Castela e León. Ten servizos de longa e media distancia operados por Renfe. Ten tamén funcións loxísticas.[1]
En 2010, os seus servizos de Media Distancia foron usados por máis de 700.000 viaxeiros.[2]
Situación ferroviaria
A estación, que se atopa a 1.132 metros de altitude, forma parte do trazado das seguintes liñas férreas:
O ferrocarril chegou á cidade abulense en 1863 cando se abriron ao tráfico os tramos Ávila-Sanchidrián e Ávila-El Escorial da liña radial Madrid-Hendaia.[4] Ávila convertíase así na primeira capital de provincia en unirse a Madrid no longo traxecto de camiño a Francia. Rivon, un enxeñeiro francés, foi o encargado de poñer en pé a estación de Ávila.[5] Posteriormente Avillumer, outro enxeñeiro de Norte tamén francés, ampliou o edificio orixinal, que se mantivo invariable ata 1958 cando a electrificación e o desdobramento da vía, así como o empalme coa liña férrea a Salamanca, levaron a Renfe, que explotaba a estación desde a nacionalización de Norte en 1941, a construír un novo edificio para viaxeiros á vez que se melloraban as instalacións existentes.[5]
A actual estación, construída en 1958, sitúase fóra da muralla da cidade. Componse dun pavillón central de dous pisos ao que flanquean varias ás laterais. Está recuberta por un tellado de lousa. Fronte ás próximas estacións de Medina del Campo ou Valladolid mostra un deseño moito máis sobrio, froito da súa reconstrución ao final da década dos 50.
Dispón de catro plataformas, unha lateral e tres centrais, ás que acceden oito vías. Todas as plataformas dispoñen de marquesiña propia.
Ten venda de billetes, atención ao cliente, aseos, información turística, cafetería e restaurante. Todo o recinto está equipado con servizos adaptados para as persoas con minusvalía. No exterior existe un aparcadoiro, unha parada de taxi e outra de autobuses urbanos.
