Compás (música)

Para outras páxinas con títulos homónimos véxase: Compás.

Exemplo de tramo musical con tres compases.

O compás musical pode definirse como a división rítmica de fragmentos de igual duración que se leva a cabo nunha obra. É a división do tempo en partes iguais. Tamén se define como a unidade de tempo que serve para medir a duración das notas e dos silencios. Cada unha das divisións realizadas constitúe un compás.

Tipos de compases musicais

Os compases serven para estruturar a música, e determina en boa medida o seu carácter e estilo. A elección do compás inflúe no carácter da peza, así o compás ternario evoca fluidez, mentres que o cuaternario aporta estabilidade. Existen diversos tipos de compás, clasificados segundo o número de pulsos ou tempos que contén. Na danza, o compás determina o ritmo dos pasos. Por exemplo, a polca, en compás binario, ten un ritmo rápido e animado (uns 52 compases por minuto, segundo o tratado de Cellarius de 1847.^[1]

• Compases simples: Típicos en música popular, teñen un máximo de 4 tempos, como 2/4, 3/4 e 4/4.
• Compases compostos: Baseados en unidades ternarias, por exemplo, o 6/8 é un 2/4 composto.
• Compases irregulares ou alternados: Combinan compases máis simples para obter métricas como 5/4 (2/4 + 3/4) ou 7/4 (4/4 + 3/4).
• Compases complexos: Usados en rock progresivo, combinan diferentes métricas, como 4/4 seguido de 3/4, para crear patróns rítmicos únicos.
• Compases correspondentes: Cada compás simple ten un equivalente composto, como 2/4 (simple) e 6/8 (composto).
• Compases Irracionais: Toman denominadores non convencionais (non potencias de dous), como 3/5 ou 7/9, e foron populares na década de 1970 e de 1980.

Relación entre ritmo e compás

A relación entre ritmo e compás é central na música. Ambos conceptos, aínda que moi relacionados, teñen definicións distintas:

• Ritmo: Refírese á secuencia de sons e silencios en música, caracterizado pola repetición periódica de tempos fortes e débiles.^[2] Define cando un son ou nota se produce e a súa duración. Pode ser regular ou irregular, e varía con base no estilo e xénero musical.^[3]

• Compás: É a agrupación cíclica de pulsos ou batidas. Estes pulsos son percibidos como unha secuencia de latexos fortes e débiles. O compás serve para organizar o ritmo en seccións e proporciona un marco para a organización rítmica.^[4]

A interacción entre o ritmo e o compás é esencial na percepción e interpretación da música. Mentres o ritmo describe patróns temporais específicos, o compás ofrece unha estrutura repetitiva para a presentación destes patróns.^[3]

Notas

1. "Polca - Auñamendi Eusko Entziklopedia". aunamendi.eusko-ikaskuntza.eus (en éuscaro e castelán). Consultado o 2023-09-25. 
2. "ritmo". aplicacions.usc.es; bUSCatermos. Consultado o 2023-09-25. 
3. "Ritmo" (en inglés). Encyclopaedia Britannica. Consultado o 25 de setembro de 2023. 
4. Cooper, Grosvenor W. (1960). The rhythmic structure of music. Chicago : University of Chicago Press. ISBN 978-0-226-11521-4. 

Véxase tamén

Wikimedia Commons ten máis contidos multimedia na categoría:  Compás

Outros artigos

• Cadencia