O Club de Rugby Liceo Francés é un club de rugby español fundado en 1968 en Madrid e que actualmente compite na División de Honra B, a segunda categoría do rugby español. As cores do equipo son as da bandeira francesa, branco, azul e vermello.
O club foi fundado na tempada 1967-68. Nese ano inaugurouse o novo colexio no parque Conde Orgaz e os señores Agostini e Tyssere, que dirixían o centro, solicitaron á federación un educador. Chegou entón Luis Abad Luisón, que sembrou a paixón polo rugby e dirixiu ao equipo durante anos. Dende aquela o club non parou de medrar, ata converterse nun dos equipos máis importantes do panorama español, proporcionando moitos xogadores ás diferentes categorías da Selección Española.
O Liceo Francés ten unha forte tradición de coidado da canteira e a formación de xogadores para o futuro, sendo a súa escola unha das máis importantes de España.
A pesar de non ter gañado ningunha das 14 edicións da Liga Española de rugby que disputou, o equipo acadou o subcampionado nas tempadas 1990-91 e 1992-93. Nos anos 1989 e 2001 o equipo caeu derrotado na final da Copa do Rei. A súa última presenza na División de Honra foi na tempada 2006-07.
Na tempada 2010-11 competiu no Grupo 2 da División de Honra B, acadando a 4ª posición na clasificación final da liga, o que permitirá que o equipo participe de novo na segunda categoría do rugby nacional na tempada 2011-12.
A División de Honra comezou a disputarse en 1970. A División de Honra B existe dende a tempada 1998-99. Anteriormente a Primeira Nacional era a 2ª División do rugby español. A Primeira División Nacional existe dende a tempada 1972-73. Naceu como o 2º nivel do rugby español, e dende a tempada 1998-99 é o 3º.