Aureliano Pereira

Aureliano Pereira

Biografía
Nacemento	22 de xaneiro de 1855 Lugo, España
Morte	31 de outubro de 1906 (51 anos) Madrid, España
Actividade
Ocupación	xornalista, político
Partido político	Partido Republicano Democrático Federal Asociación Regionalista Gallega Partido Liberal Fusionista
Membro de	Real Academia Galega (membro correspondente)
Descrito pola fonte	Ensayo de un catálogo de periodistas españoles del siglo XIX (1903-1904), (sec:Pereira (Aureliano J.), p.339)

Aureliano José Pereira de la Riva, nado en Lugo o 22 de xaneiro de 1855^[1][2] e finado en Madrid^[3] o 31 de outubro de 1906,^[1][4] foi un político, xornalista e escritor galego.

Traxectoria

De orixes familiares humildes, non lle foi posible cursar estudos superiores.

Labor periodístico

Desempeñou o labor de xornalista en publicacións periódicas como El Heraldo Gallego, El Diario de Lugo e El Regional (que dirixiu desde a súa fundación en 1884 ata 1893). Colaborou con varios periódicos e revistas como La Ilustración Republicana Federal (1872),^[2]​ El Bazar (1874), La Familia (1875), Barcelona Cómica (1895), La Ilustración Española y Americana^[5]​ o El País.^[4] A finais de 1899, en Madrid, encargouse da dirección, e foi redactor, da revista Nuevo Mundo^[6], El Nacional e outros periódicos.^[5]

Ideoloxía política

Liderou o rexionalismo federalista da segunda metade do século dezanove. Estivo afiliado durante anos ao Partido Republicano Federal de Galicia,^[7] no que ocupou cargos de certo relevo provincial, chegando a ser elixido concelleiro de Lugo en 1887. O seu peso na organización federal viría confirmarse ao ser nomeado, conxuntamente con Manuel Mosquera Lequerica e Modesto Moyrón, membro da comisión encargada, xunto a Moreno Barcia, da redacción do Proxecto de Constitución para o futuro Estado Galego, texto clave do federalismo en Galicia, que sería discutido e aprobado na Asemblea de Lugo do 2 ao 7 de xullo de 1887.

Sen abandonar o federalismo, en 1890 intégrase na Asociación Regionalista Gallega de Manuel Murguía e Alfredo Brañas, como Secretario do Comité Rexionalista de Lugo. Sendo un caso único no galeguismo do século XIX, ao articular o rexionalismo cultural e político co federalismo republicano.

Republicano convencido, contrario ao caciquismo, partidario dunha sociedade laica e inimigo do sistema foral, foi un home preocupado pola situación da muller do seu tempo e un simpatizante do movemento obreiro.

Apartado da practica política rexionalista desde 1893, apoia o Partido Liberal Fusionista. En 1894 trasládase a Madrid cun posto de modesto funcionario no Ministerio de Fomento, e alí tamén, afastado de Galicia, transcorreron os derradeiros anos da súa vida.

Obra

Aureliano José Pereira de la Riva.

Entre a súa obra poética, na súa totalidade en lingua galega, destacan Cousas da aldea (1891) Terra a miña (1891) e A cova da serpe (1892), coas que obtería galardóns diversos en certames e xustas. Publicou ademais numerosas composicións soltas en xornais e revistas. Así mesmo, preocupado polo futuro da literatura galega, sentiu a necesidade de crear unha editorial, obxectivo que se acadaría finalmente co nacemento da Biblioteca Gallega, impulsada por Andrés Martínez Salazar e Juan Fernández Latorre.

Títulos

• Soledad, Lugo, 1879.^[8]
• El Regionalismo, Barcelona, 1887.^[9]
• Poesías, Lugo, 1891 (con D. L. González López).^[10]
• Romancero de la ciudad de Lugo, Lugo, 1892.^[11]
• A Cova d'a serpe, Lugo, 1892.^[12]
• El Regionalismo y la poesía gallega, Lugo, 1895.^[13]

Notas

1. Carballo (1975), p. 439
2. Máiz (2006), p. 14
3. "«Necrología». La Correspondencia de España (Madrid) (17.795)". Biblioteca Virtual de Prensa Histórica. 31-10-1906. p. 2. Consultado o 02-06-2018. 
4. Máiz (2006), p. 34
5. Ossorio (1903), p. 339
6. Revista Gallega, 244, 12-11-1899, p. 3.
7. Máiz (2006), p. 35
8. Soledad Arquivado 04 de xaneiro de 2015 en Wayback Machine.
9. El Regionalismo Arquivado 04 de xaneiro de 2015 en Wayback Machine.
10. Poesías Arquivado 04 de xaneiro de 2015 en Wayback Machine.
11. Romancero de la ciudad de Lugo Arquivado 04 de xaneiro de 2015 en Wayback Machine.
12. A Cova d'a serpe Arquivado 04 de xaneiro de 2015 en Wayback Machine.
13. El Regionalismo y la poesía gallega Arquivado 04 de xaneiro de 2015 en Wayback Machine.

Véxase tamén

Wikimedia Commons ten máis contidos multimedia na categoría:  Aureliano Pereira

Bibliografía

• Carballo Calero, Ricardo (1975) [1963]. Historia da literatura galega contemporánea. Vigo: Galaxia. ISBN 84-7154-227-7. 
• Curros Enríquez, Manuel (1911). Hijos ilustres de Galicia. Obras Completas v. IV (en castelán). Madrid: Sucesores de Hernando. 
• Fernández del Riego, Fernando (1992) [1990]. Diccionario de escritores en lingua galega (2ª ed.). Do Castro. ISBN 84-7492-465-0. (2ª ed.). Ediciós do Castro. ISBN 84-7492-465-0. 
• Máiz, Ramón; Martínez Eiras, Esther (2006). "Aureliano Pereira. Escritos sobre Federalismo e Galeguismo" A Coruña: Xunta de Galicia (CIRP). ISBN 978-84-453-4302-9.
• Ossorio y Bernard, Manuel (1903). «Pereira (Aureliano J.». Ensayo de un catálogo de periodistas españoles del siglo XIX. Madrid: Imprenta y litografía de J. Palacios.

Ligazóns externas

• Aureliano Pereira na Biblioteca Virtual Galega.
• "Lembranza de Aureliano J. Pereira" 22/01/15, RAG.