Yn 'e tweintichste iuw wie de rindierhoederij yn Alaska konsintrearre op it Seward-skiereilân sûnt yn 1892 de earste domestisearre rindieren ymportearre waarden út eastlik Sibearje. Men miende dat men de keppels domestisearre rindieren en de migrearjende lânseigen wylde rindieren (of kariboes) fan Alaska útinoar hâlde koe fanwegen de geografy fan it Seward-skiereilân. Dat gie mear as hûndert jier goed, mar yn 1997 joegen de domestisearre keppels har by de Westlike Arktyske Kariboekeppel, doe't dy op syn simmertrek troch it skiereilân kaam, en ferdwûnen om nea wer weromsjoen te wurden.
It noardeasten fan it Seward-skiereilân heart ta de Northwest Arctic Borough, in borough (distrikt) fan 'e steat Alaska. It grutste part fan it skiereilân heart lykwols ta it Folkstellingsgebiet Nome fan 'e Unorganized Borough. De Unorganized Borough is grut diel fan 'e steat dat net by in distrikt yndield is en dêrom streekrjocht troch it steatsregear bestjoerd wurdt.
Demografy
Neffens in rûzing fan 'e oerheid fan Alaska op basis fan gegevens fan 'e Amerikaanske folkstelling fan 2000, hie it Seward-skiereilân yn 2005 6.429 ynwenners. Dêrfan wennen mear as 3.500 yn 'e stêdNome, oan 'e súdwestkust. Yn grutte it twadde plak wie Shishmaref, oan 'e noardwestkust. De befolkingstichtens fan it hiele skiereilân bedraacht likernôch 0,3 persoanen de km².
De bewenners fan it Seward-skiereilân binne foar fierwei it meastepart etnyskeInjûpiat (Iñupiat, ek Inupiaq neamd). Dy hearre ta de folkekloft fan 'e Eskimo's en binne de westlikste groep Inûyt (Inuit). Súdlik en westlik fan harren, yn súdwestlik en súdlik Alaska en yn eastlik Sibearje wenje de Jûpik (Yup’ik), in oar Eskimofolk.