Boppemar

Boppemar
De Boppemar yn dûnkerblau, mei de oare Grutte Marren yn ljochtblau.
geografy
type wetter	mar
lokaasje	easten fan Noard-Amearika
lân	Feriene Steaten Kanada
koördinaten	47°7′N 87°5′W
ûnderdiel fan	Grutte Marren
sifers
maks. lingte	560 km
maks. breedte	260 km
oerflak	127.700 km²
djiptegemiddelde	147 m
djipste punt	406 m
wetterfolume	12.000 km³

De Boppemar (Ingelsk: Lake Superior; Frânsk: Lac Supérieur), is de grutste fan 'e fiif Grutte Marren fan eastlik Noard-Amearika, mei in oerflak fan 127.700 km². It djiptegemiddelde is 147 m, mei in djipste punt op 406 m ûnder it wetteroerflak. Op it breedste punt mjit dit wetter 260 km, en op it langste punt 560 km. It wurdt oer it algemien beskôge as de grutste swietwettermar yn 'e wrâld as dat neffens wetteroerflak metten wurdt, en it is de op twa nei grutste swietwettermar fan 'e wrâld (en de grutste fan hiele Amearika) as dat metten wurdt neffens de hoemannichte wetter.

Pictured Rocks, yn Michigan.

De Boppemar wurdt oan 'e súdkant begrinzge troch de Amerikaanske steaten Minnesota, Wiskonsin en Michigan, en oan 'e noardkant troch de Kanadeeske provinsje Ontario. Yn 'e mar, tichter by de noardkust as by de súdkust, lizze in stikmannich lytseftige eilannen, nammentlik: it Isle Royale, de Aposteleilannen, Michipicoten en de Slate-eilannen.

De namme fan 'e mar giet werom op 'e earste Frânske ûntdekkingsreizgers yn dit diel fan Noard-Amearika, dy't de Boppemar yn 'e rin fan 'e santjinde iuw benei kamen fia de Hueronmar, dy't streamôf leit yn it systeem fan rivieren en marren dêr't de Boppemar ta heart. Sadwaande neamden se dit nije wetter le lac supérieur, of "boppe(lizzende) mar", d.w.s. "de mar dy't boppe (of streamop fan) de Hueronmar leit".

Boarnen, noaten en referinsjes

Boarnen, noaten en/as referinsjes:

Foar boarnen en oare literatuer, sjoch ûnder: References en Bibliography, op dizze side. Commons Wikimedia Commons  Ofbylden dy't by dit ûnderwerp hearre, binne te finen yn de kategory Lake Superior fan Wikimedia Commons.