Baraga (Michigan)

Baraga
Bestjoer
Lân	Feriene Steaten
Steat	Michigan
County	Baraga County
Township	Baraga Township
Sifers
Ynwennertal	2.027 (2012)
Oerflak	5,7 km² (ynkl. wetter) 5,5 km² (allinnich lân)
Befolkingsticht.	373,9 / km²
Hichte	192 m
Oar
Stifting	1843
Tiidsône	UTC –5
Simmertiid	UTC –4
Koördinaten	46°46′36″N 88°29′46″W
Offisjele webside
www.villageofbaraga.com
Kaart
De lizzing fan Baraga yn Baraga County en yn 'e steat Michigan.

Baraga (útspr.: ['bæɹəɡə], likernôch "berrukke") is in doarp yn Baraga County, yn it noarden fan 'e Amerikaanske steat Michigan. It leit oan 'e Keweenaw-baai, dy't ûnderdiel útmakket fan 'e Boppemar (ien fan 'e Grutte Marren), oan 'e noardkust fan it skiereilân Opper-Michigan. Bestjoerlik makket it doarp ûnderdiel út fan it plattelânsdistrikt Baraga Township, en leit it foar it meastepart binnen de grinzen fan it L'Anse Yndianereservaat. Yn Baraga kruse de autowegen US Highway 41 en M-38 inoar. It doarp is ferneamd nei de njoggentjinde-iuwske misjonaris en biskop Frederic Baraga. Neffens in offisjele skatting út 2012 hie Baraga doe goed 2.000 ynwenners.

Skiednis

Baraga waard yn 1843 stifte doe't de misjonaris Frederic Baraga op dit plak in missypost begûn. Yn 1869 krige de delsetting syn eigen postkantoar, doedestiden in teken fan erkenning fan hegerhân. De namme fan it doarp wie doe noch Bristol; op 11 maaie 1870 waard de namme formeel feroare yn Baraga.

It Histoarysk Museum fan Baraga County.

Demografy

Neffens in offisjele skatting troch it Amerikaanske Folkstellingsburo op grûn fan gegevens fan 'e folkstelling fan 2010 hie Baraga yn 2012 in befolking fan 2.027 minsken. De befolkingstichtens bedroech 373,9 minsken de km². Neffens gegevens fan 'e folkstelling fan 2010 wie doe fan 'e befolking fan Baraga 10,0% âlder as 65 jier en 15,8% jonger as 18 jier. Fierders bestie 41,2% fan 'e húshâldings út ien persoan, wylst yn 2000 15,6% fan 'e befolking ûnder de earmoedegrins libbe, ynkl. 20,1% fan 'e lju yn 'e leeftydskategory fan boppe de 65 jier.

Wat de etnyske opbou fan 'e befolking oangiet, dy wie yn 2010 sa: 43,9% blanken; 29,4% swarten; 22,0% Yndianen; 1,0% Latino's; 0,1% Aziaten; 3,6% oaren of fan mingd etnysk komôf. Fan 'e blanke befolking wie yn 2000 25,5% fan Finsk komôf, 9,9% fan Frânsk komôf, 9,2% fan Dútsk komôf en 6,3% fan Frânsk-Kanadeesk komôf.

Fan 'e Yndianen bestiet de grutte mearderheid út etnyske Odjibwe (Ojibwe), ek wol Tsjippewa (Chippewa) neamd. Yn Baraga is it haadkertier fêstige fan 'e federaal erkende Keweenaw Bay Yndianemienskip fan de L'Anse en Ontonagon Troepen fan Tsjippewa Yndianen. Baraga leit foar it meastepart binnen de grinzen fan it L'Anse Yndianereservaat fan 'e Keweenaw Bay Yndianemienskip.

Klimaat

Baraga hat in lânklimaat, mei oangenaam waarme simmers en tige kâlde winters. Yn july, de waarmste moanne, is de trochsneed temperatuer oerdeis 25,6 °C, en yn jannewaris, de kâldste moanne, is dat –5,6 °C. Baraga kriget jiers trochinoar 866 mm delslach, mei dêrûnder oer it hiele winterhealjier ferdield 376 sm snie.

Keppelings om utens

• (in) Offisjele webside fan Baraga

Boarnen, noaten en referinsjes

Boarnen, noaten en/as referinsjes:

Foar boarnen en oare literatuer, sjoch ûnder: References, op dizze side. Commons Wikimedia Commons  Ofbylden dy't by dit ûnderwerp hearre, binne te finen yn de kategory Baraga, Michigan fan Wikimedia Commons.