Lourdes Auzmendi

Lourdes Auzmendi
(2011)
Bizitza
Jaiotza	Ataun, 1956 (68/69 urte)
Herrialdea	Gipuzkoa, Euskal Herria
Hezkuntza
Hizkuntzak	euskara gaztelania
Jarduerak
Jarduerak	itzultzailea eta politikaria
Enplegatzailea(k)	Euskal Herriko Unibertsitatea

Lourdes Auzmendi Aierbe (Ataun, Gipuzkoa, 1956) itzultzailea, interpretea eta politikaria da. Eusko Jaurlaritzako Hizkuntza Politikarako sailburuorde izan zen 2010eko martxotik 2012ko abendura.^[1]

Bizitza

Hamabi senideren artean gazteena,^[2] Euskadiko Ezkerreko zuzendarietakoa izandako Martin Auzmendiren arreba da.^[3] Familia eta herri guztiz euskaldunean hazi zenez, txikitan gaztelaniaz ez zekien mintzatzen. Herriko eskolako maistrak gogor zigortzen zuen horregatik, eta hamaika urte zituela gurasoek Donostiako moja jesuiten kolegiora —Gipuzkoako burgesiaren alabak biltzen zituen ikastetxera— bidali zuten barneko ikasle, gaztelaniaz ikas zezan. Filosofia eta Itzulpengintza ikasiko zuen gero.^[2]

Frankismoaren garaian etakide izana, Perturren bikotekide zen, ETA (pm)-ko buruzagi hori desagertu zenean (1976); geroztik, Pertur hil izana leporatzen dio ETAri Auzmendik. 1970eko hamarkadaren bukaeran, Zeruko Argiako kazetari izan zen. Gero Euskadi Irratian ere aritu zen kazetari. Yoyes adiskide mina zuen; ETAk hura hil zuenean (1986) Auzmendi jota geratu zen, eta, albistegietako aurkezle izatearen estresari aurre egin ezinda, Euskadi Irratia utzi eta itzulpengintzari heldu zion.^[2]

1987an, EIZIEren (Euskal Itzultzaile, Zuzentzaile eta Interpreteen Elkartea) sortzaileetako bat izan zen, eta elkarte horretako lehendakari ere bai aldi batez. 2001etik 2017. urtera bitartean Euskal Herriko Unibertsitatean irakasle aritu zen lanean, Itzulpengintzako lizentziaturan.^[4] Euskal komunitate zientifikoaren Inguma datu-basean, berak sorturiko 25 lan baino gehiago bildu dira.^[5]

2004an, Aldaketa, Cambio por Euskadi plataforma sortzeko manifestuaren sinatzaileetako bat izan zen Lourdes Auzmendi. 2009ko Eusko Legebiltzarrerako hauteskundeetan, plataforma horrek Patxi López hautagaiaren alde egin zuen; hautagai horrek hauteskundeak irabazita, Eusko Jaurlaritzak Euskara Sustatzeko zuzendari izendatu zuen Auzmendi, Ramon Etxezarretak zuzendutako Hizkuntza Politikarako Sailburuordetzaren barruan. 2010eko martxoan, Etxezarretak dimisioa eman zuenean, Auzmendi izendatu zuten sailburuorde.^[6]

2024ko abendutik UZEIko lehendakaria da.

Erreferentziak

1. Nerea AZURMENDI: «Lourdes Auzmendi, una larga trayectoria como traductora», Diario Vasco, 2010-03-31.
2. ↑ Xabier EUZKITZE eta beste: Lourdes Auzmendiri egindako elkarrizketa, ETB 1eko Anitzele telebista saioa, 2011-12-15.
3. David GUADILLA: «La ex compañera de 'Pertur' será la directora de Promoción del Euskera del Gobierno Vasco», Diario Vasco, 2009-06-03.
4. II Hiritar Digitalen Nazioarteko Kongresuko Hizlariak.
5. Lourdes Auzmendiren produkzioa Inguma datu-basearen arabera (>25 produktu).
6. Agurtzane SOLABERRIETA: «Lourdes Auzmendi izendatu du Jaurlaritzak Hizkuntza Politikarako sailburuorde»^{[Betiko hautsitako esteka]}, Berria, 2010-03-31.

• Datuak: Q12262637