Iñaki Kerejazu Gonzalez de Aspuru (Gasteiz, Araba, 1995eko urtarrilaren 19a) ezizenez "Kere" Gasteizko jaiei hasiera ematen dien Zeledon da 2024. urtetik gaurdaino, Gorka Ortiz de Urbina ordezkatuta. Historian bosgarren Zeledon da, eta Hegotarrak blusa taldeko kide.
2023ko abenduaren 12an jakin zen zein izango zen Gorka Ortiz de Urbina ordezkatuko zuena[1], eta hura agertu zen hautagai, beste kuadrilletako lagun askoren artean.
2004an Zeledon txikia gorpuztu zuen, eta, horrekin batera, urte askoan ibili da Zeledon Elkartean laguntzaile.
Adurtzan jaio zen, eta Olabide Ikastolan ikasi zuen txikitatik. Gaur egun, berriz, Lehen Hezkuntzako irakasle aritzen da Gasteizko San Viator ikastetxean, EHUn Lehen Hezkuntzako Gradua ikasi ondoren. Era berean, Ttek elektrotxarangako abeslaria da, eta Disk jockey lanetan ere aritzen da, DJ Malandro izenez.