Ana Higueras Aragón (Madril – 1944ko maiatzaren 6a) madrildar soprano abeslaria da.[1]
Biografia
Ana Higueras 1944ko maiatzaren 6an jaio zen Horacio Rodríguez Martínez eta Dolores Aragón Ortigosa aitona-amonen etxean, Madrileko Martínez Campos kaleko 17an, gero 21.
Ana María Rodríguez Aragónen eta Jacinto Higueras Cátedraren alabak bataioa jaso zuen maiatzaren 21ean, Santa Teresa eta Santa Isabel parrokian. Luis Soria jaunak, parrokoak, eman zion bataioa. Amaren arreba izan zuen amabitxi, Lola Rodríguez Aragón abeslari soprano eta musika-irakaslea; aitabitxi, ostera, Horacio Rodríguez Martínez, amaren aitona.[1]
1945. urtearen hasieran, Horacio aitonak finka bat erosi zuen Mirakruz gainean, Donostian, "Echaide Borda" zuen izena, eta hantxe igaro zituen udak familiarekin 1954ra arte, urte horretan saldu baitzen. Handik aurrera udak Coruñan eta Donostian pasatu zituen.
Ekainaren 12an jaio zen Lola ahizpa. Bi ahizpak Martínez Campos 17an bizi izan ziren gurasoekin, osaba-izebekin eta aitona-amonekin, 1959ko amaiera arte.
Ekainaren 15ean, Anak eta haren ahizpa Lolak lehen jaunartzea jaso zuten Federico Sopeñaren eskutik Saint Dendetako mojetan, Eduardo Daton, non irailean hasibaitzituzten lehen hezkuntzako ikasketak.[1]
Familia
Artista familia handi batetik dator: Jacinto Higueras Cátedra eskultorearen alaba da eta Lola Rodríguez Aragón sopranoaren eta Modesto Higueras Cátedra zuzendariaren iloba.[2]
Jacinto Higueras Fuentes eskultorearen aitona zuen, eta omenaldia egin zion Jaen hirian.[3]
Ikasketak
1958ko uztailean Anak arrakastaz gainditu zituen Madrilgo Lope de Vega Institutuko 4. mailako errebalida-azterketak, eta irailean musika-ikasketak hasi zituen Errege Musika Kontserbatorioan. Bertan kantua ikasi zuen izeba Lola Rodríguez Aragónekin, Roberto Plarekin solfeoa, Esther Conderekin pianoa, Antonio Ramírez Angelekin harmonia eta Estetika eta Historia de la Música. Jacinto Higueras Cátedra eskultoreak gitarrako eskola partikularrak eta marrazki eta eskultura klaseak hartu zituenaitarekin, Contanoren estudioan, 32, alemanezko klaseez gain, Madrilgo Instiruto Alemanean, eta bereziki María Schusterrekin. Goi-mailako batxilergoko ikasketak egiten jarraitu zituen Miguel de Cervantes ikastetxean.[1] Ikasle prodijioa izan zen. 14 urterekin hasi zen Madrilgo Musika Kontserbatorio Nagusian.[4]
Irailean hasi zuen izeba Lola Rodríguez Aragónek Madrilgo Zarzuela Antzokiko enpresaburu-esperientzia bi denboralditan. Ana eta bere ahizpa egunero joaten ziren Zarzuelara, entseguak eta emanaldiak ikustera, eta musikaren eta ikuskizunen munduko pertsona garrantzitsuak ezagutu zituzten.[1]
1965ean, Toulouseko Nazioarteko Kantu Lehiaketa irabazi zuen, Théâtre du Capitole-n.[5]
Sopranoa zela,[6] hainbat musika-konposiziotan lan egin zuen, besteak beste, Pablo Sorozabalenetan.[7][8]
Lan ibilbidea
1962an Madrilgo Kontserbatorioan kantu-ikasketak amaitu aurretik, hainbat aldiz aritu zen jendaurrean. Azaroaren 23an eta 25ean, "Pleiadeetako" bat abestu zuen, Manuel de Fallaren "Atlántida"-ren Madrilgo estreinaldian, Frühbeck de Burgosek zuzendutako Orkestra Nazionalarekin eta Victoria de los Angelesen emanaldiarekin.
1963an martxoaren 8an eta 10ean, Félix Mendelssohnen "El Sueño de una Noche de Verano"-ren lehen solista abestu zuen Madrilgo Monumental Cineman eta Musika Jauregian, Odón Alonsoren zuzendaritzapean.
Maiatzaren 25ean, Carlos Manso piano-jole argentinarrarekin batera, Konpositore Argentinar Garaikideei eskainitako emanaldia abestu zuen Madrilgo Errege Musika Kontserbatorioan.
Urriaren 30ean, Valladolideko X. Jaialdian, "Zerlina" abestu zuen Mozarten "D. Juan", Odón Alonsoren musika-zuzendaritzapean eta Luis Escobar-en eszenikarekin, beste zenbait kantarirekin batera: Isabel Penagos, Consuelo Rubio, Renato Capecci, Juan Oncina, Marco Stefanoni edo Giorgio Tadeo.
Azaroaren 22an, Madrilgo Errege Musika Kontserbatorioan, karrera-amaierako sariak banatu ziren. Ana Higuerasek "Lehen Mailako Diploma" eta "Lucrecia Arana Saria" jaso zituen, kantu-ikasketak amaitutakoan.
1964ko maiatzaren 14an, Madrilgo Ateneoan, Aita Feijoari egindako omenaldian parte hartu zuen, Literes, Juan del Vado, Pla, B. de Laserna eta Mozarten obrekin, Miguel Zanettirekin pianoan, Federico Sopeñaren hitzaldia entzun ondoren.
1965ean Victoria de los Ángelesekin batera Manuel de Fallaren Una Vendedora eta Carmela grabatu zituen, Frühbeck de Burgos zuzendari zela.
Sariak
- "Lucrecia Arana Saria" jaso zituen, kantu-ikasketak amaitzean
Erreferentziak
Kanpo estekak
