Будынак крэдытнага банка — будынак у гістарычным цэнтры Пінска, размешчаны па вуліцы Заслонава, 8, на рагу з вуліцай Каржа.
Пабудаваны ў 1920-х гг. з цэглы[1].
Тут 26 чэрвеня 1941 г. Пінскім абкамам КП(б)Б быў створаны адзін з першых у Беларусі партызанскіх атрадаў з 60 партыйных і савецкіх працаўнікоў і камсамольцаў Пінска. Камандзір атрада — загадчык сектара Пінскага абкама КП(б)Б, удзельнік рэвалюцыйнага руху ў Заходняй Беларусі ў 1922—1925 гг. і нацыянальна-рэвалюцыйнай вайны ў Іспаніі ў 1936—1937 гг. В. З. Корж (псеўданім Камароў), камісары — М. І. Бандаравец, В. Ц. Меркуль. У ліпені — жніўні 1941 г. у атрадзе ваявала В. З. Харужая — Герой Савецкага Саюза (1960). У сакавіку 1943 г. на базе атрада В. З. Каржа створана партызанская брыгада імя С. М. Будзённага Пінскага партызанскага злучэння, якая змагалася з нямецка-фашысцкімі акупантамі на тэрыторыі Ленінскага раёна Пінскай вобласці. Да дня злучэння з Чырвонай Арміяй (17.7.1944) брыгада налічвала 1078 чалавек (3 атрада). За баявыя заслугі ў гады Вялікай Айчыннай вайны камандзіру атрада, пазней камандзіру Пінскага партызанскага злучэння, В. З. Каржу 15.8.1944 г. прысвоена званне Героя Савецкага Саюза[2].
У 1964 г. на будынку пастаўлена мемарыяльная дошка ў памяць пра стварэнне партызанскага атрада[2].
Цяпер тут размешчана музычная школа[1].
Помнік архітэктуры з элементамі мадэрну[1].
Двухпавярховы будынак мае нерэгулярны план, абумоўлены вуглавым размяшчэннем аб’екта. Вуглавая частка дома на першым паверсе закруглена, а на другім зрэзана, у выніку чаго ўтвораны своеасаблівы балкончык. Рытм і памеры вокнаў вызначаны функцыянальным рашэннем будынка. Уваходны партал размешчаны асіметрычна і падкрэслены вялікім паўцыркульным акном над ім. Планіроўка калідорная, Т-падобная, з двухбаковым размяшчэннем памяшканняў[1].