Ірына Міхайлаўна Дубянецкая

Ірына Міхайлаўна Дубянецкая
Дата нараджэння	23 мая 1964(1964-05-23) (60 гадоў)
Месца нараджэння	Мінск, БССР, СССР
Бацька	Міхаіл Фёдаравіч Дубянецкі
Род дзейнасці	філосаф
Навуковая ступень	доктар філасофіі
Альма-матар	філалагічны факультэт БДУ Лёвенскі каталіцкі ўніверсітэт
Член у	Талака

Ірына Міхайлаўна Дубянецкая (нар. 23 мая 1964, Мінск) — доктар багаслоўя^[1]. Дачка выдаўца і пісьменніка Міхася Дубянецкага, сястра паэткі Галіны Дубянецкай.

Біяграфія

Нарадзілася ў сям’і беларускага перакладчыка Міхаіла Дубянецкага^[1]. Скончыла філалагічны факультэт БДУ. Працавала ў Музеі гісторыі беларускай літаратуры, выкладала на філалагічным факультэце БДУ, у Інстытуце замежных моў, Акадэміі мастацтваў. У канцы 1980-х з'яўляўся удзельнікам таварыства «Талака»^[2][3], якое займалася адраджэннем беларускай культуры. Адна з ініцыятараў пачатага ў 1989 годзе руху за адраджэнне Беларускай грэка-каталіцкай царквы. Разам з сябрамі ў 1990 годзе заснавала часопіс «Унія»^[1], была яго галоўным рэдактарам.

Разам з Каралінай Мацкевіч з 1992 года вучылася ў Лонданскім місіянерскім інстытуце, дзе яны былі першымі свецкімі жанчынамі-студэнтамі. У 1997—2005 гадах вучылася ў Лёвенскім каталіцкім універсітэце, дзе атрымала ліцэнзіят у арыенталістыцы (біблейскія студыі) і, у 2005 годзе, абараніла доктарскую дысертацыю «Космас і хаос у яўрэйскай Бібліі і міфалогіях старажытнага Блізкага Усходу», і такім чынам стала першай беларускай жанчынай, якая дасягнула ступені доктара сакральнай тэалогіі.^[4]

Валодае іўрытам, грэчаскай, арамейскай, угарыцкай, фінікійскай^[1] і іншымі мовамі старажытнага Блізкага Усходу.

Выкладае ў Беларускім калегіуме і вядзе школу Бібліі для дарослых. Член Саюза беларускіх пісьменнікаў.

Захапляецца музыкай Хільдэгарды Бінгенскай, музыкай англійскага барока і фламандскіх поліфаністаў.

Дзейнасць

Займаецца біблеістыкай, вывучае старажытныя мовы і цывілізацыі Блізкага Усходу. Піша вершы.

Зноскі

1. Даведка рэдакцыі да артыкула І. Дубянецкай «Айцец» // Наша Ніва № 32 (241), 6 жніўня 2001 г.
2. Ірына Дубянецкая: Сяржук ішоў з самым цяжкім заплечнікам наперадзе грамады і яшчэ пры гэтым сьпяваў (нявызн.). Радыё Свабода (8 красавіка 2015). Праверана 7 сакавіка 2019.
3. Аляксандр Тамковіч. Пачатак уласных праектаў (нявызн.). Пачаткі Ірыны Дубянецкай. Новы Час (12 сакавіка 2017). Праверана 7 сакавіка 2019.
4. Дубянецкая, Ірына. Будучыня не прадказваецца, будучыня ствараецца  (бел.). Радыё Свабода (28 красавіка 2012). Праверана 28 чэрвеня 2020.

Літаратура

• Даведка рэдакцыі да артыкула І. Дубянецкай «Айцец» // Наша Ніва № 32 (241), 6 жніўня 2001 г.