PROFILBARU.COM

Mine Okubo
Mine Okubo
Doğum tarixi	27 iyun 1912
Doğum yeri	Riversayd[d], Riversayd, Kaliforniya, ABŞ;
Vəfat tarixi	10 fevral 2001 (88 yaşında)
Vəfat yeri	Qrinviç Villic[d], Manhetten, Nyu-York, Nyu-York ştatı, ABŞ;
Təhsili	Berkli Kaliforniya Universiteti
Fəaliyyəti	vizual incəsənət rəssamı
	Vikianbarda əlaqəli mediafayllar

Mine Okubo (ing. Miné Okubo; 27 iyun 1912^[1], Riversayd^[d], Kaliforniya – 10 fevral 2001, Qrinviç Villic^[d], Nyu-York ştatı) – yaponəsilli ABŞ sənətçisi və yazıçısı. İkinci dünya müharibəsi zamanı ABŞ yaponlarının internasiya düşərgələrindəki həyatını təsvir edən "Vətəndaş 13360" kitabına görə tanınır.^[2] Mürəkkəblə çəkilmiş 206 rəsmin olduğu bu kitab bu düşərgələrdəki həyatı təsvir edən ilk kitabdır.^[3]

İlk illəri

Mine Okubo 27 iyun 1912-ci ildə ABŞ-nin Kaliforniya ştatının Riversayd şəhərində doğulmuşdur.^[2] Onun ailəsi ABŞ-yə miqrasiya etmiş birinci nəsildən olan yaponlar idi.^[2] Atası bağbanlıqla məşğul olurdu, anası isə Tokio İncəsənət İnstitutundan məzun olmuşdu.^[2]

Okubo Riversayd İcma Kollecində təhsil almış, daha sonra incəsənət üzrə master dərəcəsi əldə etmək üçün 1936-cı ildə Berkli Kaliforniya Universitetinə daxil olmuşdur.^[2] Berta Taussiq təqaüdü vasitəsilə Avropaya səyahət etmiş, lakin İkinci dünya müharibəsinin başlaması və anasının xəstələnməsi səbəbilə ABŞ-yə qayıtmışdır.^[2] O, Federal İncəsənət Proqramında işləməyə başlamış və Dieqo Riveranın sənətini öyrənmişdir.^[2] Federal İncəsənə Proqramı çərçivəsində ABŞ ordusu üçün Fort-Ord, Qovernment adası, Oklend Qonaqpərvərlik Evi və Trejer adasında divar rəsmləri və mozaikalar yaratmışdır.^[2]

İnternasiyası

1943-cü ildə ABŞ prezidenti Franklin Ruzvelt 9066 saylı sərəncamı imzaladıqdan sonra Okubo komendat saatı və səyahət məhdudiyyətlərindən azad edilmək üçün xüsusi icazə istəmişdir.^[2] Lakin o qardaşı Toku ilə birlikdə Kaliforniyanın San-Bruno şəhərində yerləşən Tanforan Toplama Mərkəzinə gətirilmiş və il yarım bir at tövləsində yaşamışdır.^[2] Daha sonra isə Yuta ştatında yerləşən internasiya düşərgəsinə göndərilmişdir.^[2]

Okubo internasiya düşərgəsinin ədəbi jurnalı üçün rəsmlər çəkmiş, məktəblilərə incəsənət dərsləri vermiş, düşərgənin qəzeti üçün redaktorluq etmişdir.^[2] O, Tanforan Toplama Mərkəzində və Topaz düşərgəsində 250 rəsm çəkmişdir.^[2] Okubo düşərgənin "Trek" adlı jurnalı tərəfindən keçirilmiş rəsm müsabiqəsində qalib gəlmiş və məqalələrinin yayımlanması üçün "Fortune" jurnalı ilə müqavilə bağlamışdır.^[2] Müharibənin başa çatmasına yaxın jurnalın redaktorları onu Nyu-York şəhərinə gətirə bilmişdirlər.^[2]

Okubo Nyu-York şəhərində jurnal və kitab illüstratoru kimi tanınmağa başlamışdır.^[2] Onun işləri "Time", "Life" və "New York Times" kimi nəşrlərdə peyda olmuşdur.^[2] Okubo 1950-ci ildə Nyu-Yorku tərk edərək Berkli Kaliforniya Universitetində incəsənət üzrə mühazirələr verməyə başlamışdır.^[2] Lakin 1952-ci ildə sənət bacarığını inkişaf etdirmək üçün Nyu-Yorka qayıtmışdır.^[2] Əsərləri Nyu-York, Massaçusetts və Oklenddə sərgilənmişdir.^[2]

Vətəndaş 13660

İkinci dünya müharibəsindən sonra yazılmış "Vətəndaş 13660" Okubonun ən məşhur əsəri sayılır və internasiya həyatını əks etdirən rəsmlər, eləcə də, şərhlərdən ibarətdir.^[2] Kitab ABŞ yaponlarının internasiyasını əks etdirən ilk kitabdır.^[2] 13660 Okubonun internasiya düşərgəsindəki nömrəsi olmuşdur.^[2] Okubo bu əsəri ona məktub yazan və tədarük göndərən dostları üçün internasiya təcrübəsini sənədləşdirmək ideyası ilə yazmağa başlamışdır.^[2] Kitabdakı rəsmlərin çoxunu müşahidəçi qismində çəkdiyi üçün əsər avtobioqrafik də sayılır.^[2]

Okubo kitabın nəşri üçün nəşriyyat tapmaqda çətinlik çəksə də, 1946-cı ildə Columbia University Press ilə razılığa gələ bilmişdir.^[2] Kitab 1983-cü ildə University of Washington Press tərəfindən yenidən nəşr olunana qədər kiçik tiraj seriyaları ilə dövriyədə olmuş və bir neçə dilə tərcümə olunmuşdur.^[3] Okubo 1981-ci ildə Müharibə Dövründə Vətəndaşların Yerdəyişməsi və İnternasiyası üzrə ABŞ Konqres Komissiyası üçün şahidlik etmiş və kitabı komissiyanın qeydlərinə daxil olmuşdur.^[2] Kitab 1984-cü ildə Amerika Kitab Mükafatına layiq görülmüşdür.^[3]

İstinadlar

↑ ¹ ² Bibliothèque nationale de France Miné Okubo // BnF identifikatoru (fr.): açıq məlumat platforması. 2011.
↑ ¹ ² ³ ⁴ ⁵ ⁶ ⁷ ⁸ ⁹ ¹⁰ ¹¹ ¹² ¹³ ¹⁴ ¹⁵ ¹⁶ ¹⁷ ¹⁸ ¹⁹ ²⁰ ²¹ ²² ²³ ²⁴ ²⁵ ²⁶ ²⁷ Asian American: History and Culture - An Encyclopedia. səh. 449
↑ ¹ ² ³ Asian American: History and Culture - An Encyclopedia. səh. 448

Ədəbiyyat

Ling, Huping; Austin, Allan. Asian American: History and Culture - An Encyclopedia (ingiliscə). Routledge. 2010. səh. 448–449. ISBN 978-0-7656-8077-8. İstifadə tarixi: 1 noyabr 2022.