Toronto (pronunciáu n'inglés [təˈrɒntoʊ] y, llocalmente, [ˈtrɑnoʊ] o [təˈɹɑnoʊ]) ye la capital de la provincia d'Ontario y, con una población de 2 794 356 habitantes (2021)[2][3], la ciudá más grande de Canadá, amás del centru financieru de dichu país.
Alcontrada al noroeste del llagu Ontario, ye la quinta ciudá más grande de Norteamérica.
Toronto alcuéntrase nel corazón del Área Metropolitana de Toronto (Greater Toronto Area, n'inglés y embrivíu como GTA), la mayor área metropolitana de Canadá, y ye parte d'una rexón densamente poblada nel centru-sur d'Ontario, conocida como Golden Horseshoe (Ferradura Dorada), onde moren ocho millones d'habitantes.
Al ser la capital económica de Canadá, Toronto ye considerada una ciudá global y una de les principales ciudaes financieres del mundu. Lidera los sectores económicos de finances, servicios empresariales, telecomunicaciones, aeroespacial, tresporte, medios de comunicación, arte, cine, televisión, publicidá, software, investigación médica, educación, turismu, ya la industria del deporte: el Toronto Stock Exchange ye la mayor bolsa de valores del país y la séptima del mundu.
Toronto ye famosa pola Torre CN, con 553 metros d'altor; la ciudá considérase'l centru de la cultura canadiense anglófona, y ye la anfitriona de munches celebraciones nacionales.
La población de Toronto ye cosmopolita, y ye un importante destín pa munchos inmigrantes a Canadá.
Toronto ye la mayor ciudá del mundu en porcentaxe de residentes ensin nacer nel mesmu país: sobre un 49% de los habitantes de la ciudá nun nació en Canadá.[ensin referencies]
Debíu al baxu índiz de criminalidad, el cuidu mediu ambiente y l'altu nivel de vida, Toronto, ye considerada con avezamientu una de les ciudaes meyor habitables del mundu. Amás, en 2006 foi clasificada como la ciudá más cara de Canadá.[ensin referencies]
Los nacíos en Toronto reciben el xentiliciu de torontonianos.
En xineru de 2005, Toronto foi escoyida pol gobiernu canadiense como una de les capitales culturales del país.
