El Mississippi ye un ríu de los Estaos Xuníos. Forma, xunto'l so afluente, el ríu Missouri, el sistema fluvial más grande de Norteamérica.
El ríu Mississippi naz nel llagu d'Itasca, al norte del estáu de Minnesota, y va lentamente hacia'l mar, formando amplios meandros en direición norte-sur. Tres percorrer 3.730 km de la zona central de los Estaos Xuníos desemboca, formando un gran delta, nel golfu de Méxicu. Xunto col so afluente, el Missouri (4.130 km de llargor) forma una gran conca que drena total o parcialmente les agües de 31 estaos comprendíos ente los Montes Rocosos al oeste y los montes Apalaches al este, incluyíes la mayor parte de les Grandes Llanaes, y ye'l cuartu ríu más llargu del mundu.
La boca del ríu foi camudando col tiempu. Desque se construyó una canal a entamos del sieglu XIX, el ríu foi guetando la boca del ríu Atchafalaya, aproximadamente a 95 kilómetros de Nueva Orleans. El Cuerpu d'Inxenieros del Exércitu d'EE.XX. caltién una estensa cadarma d'escluses pa caltener el ríu nel so cursu presente.
Otros camudamientos nel cursu del ríu ocurrieron debío a terremotos a lo llargo de la zona de la falla de New Madrid, que s'alcuentra ente les ciudaes de Memphis y Saint Louis (Missouri). Trés terremotos en 1811 y 1812, estimaos n'aproximadamente de gráu 8 na escala Richter, invirtieren temporalmente'l cursu del Mississippi. Estos terremotos tamién crearon el llagu Reelfoot en Tennessee, camudando'l paisax a la vera'l ríu.
Enantes de que s'implantare'l ferrocarril en Norteamérica, el ríu Mississippi foi una de les principales víes de comunicación y tresporte. El so ampliu calce permitía la navegabilidá treslladando mercancíes y persones.
