Recife ye una ciudá de Brasil, capital d'estáu de Pernambuco. El so municipiu, de 218 km² d'estensión, tien 1.561.659 habitantes (Instituto Brasileiro de Geografia e Estatística, 2009). El so área metropolitana, de 3.768.902 habitantes, ye la mayor de tou el norte y noreste de Brasil y la cuarta en población de tou el país. La ciudá ta asitiada nel llugar nel quel ríu Beberibe s'axunta col Capibaribe, que desemboca nel océanu Atlánticu na mesma ciudá, que tien ún de los puertos más importantes del país. Amás del Capibaribe, hai munchos otros ríos más pequeños que desagüen al mar na ciudá y determinen la formación de milenta islles xuníes por más de 50 pontes: tou eso caracteriza el trazáu de la ciudá, que ye conocida como la Venecia brasilana.
La Rexón Metropolitana de Recife ye'l principal centru industrial del estáu de Pernambuco, y inclúi fábriques alimentaries, de productos electrónicos y, perriba de too, de derivaos de la caña de azúcar (azúcar, bioetanol...). Les más d'elles instaláronse nes décades de 1970 y 1980 aprovechando los incentivos fiscales del gobiernu, y complementen el papel tradicional de la ciudá como centru comercial del norte-noreste de Brasil: hai asentaes nella más de 52.500 empreses, y otres 32.500 más nel so área metropolitana. Amás d'ello, la ciudá ye, dempués de São Paulo, el segundu centru más importante del país n'atención médica, con hospitales peravanzaos y perequipaos qu'atraen pacientes de los estaos vecinos.
El sector turísticu, como en toles ciudaes del noreste, ta desarrolláu enforma . La sablera de Porto de Galinhas, que ta a 60 km al sur de la ciudá, tien fama de ser una de les más guapes de too Brasil, y la ciudá mesma recibe bien de turistes. P'agospialos, a ellos y a la xente que llega a ella por negocios al so aeropuertu internacional (nomáu Gilberto Freyre/Guararapes), hai una infraestructura de servicios de les más importantes del país. Sicasí, entá puede meyorar muncho.
La ciudá, d'otra banda, ye tamién un centru educativu de gran importancia. Destaca, ente les instituciones que s'asienten nella, la Universidá Federal de Pernambuco, la mayor del estáu.
Llocalidaes hermaniaes
Les ciudaes hermaniaes con Recife son:
Referencies
Enllaces esternos