El Mediu Oeste d'Estaos Xuníos, conocíu n'inglés como Midwestern United States, American Midwest, Middle West o simplemente Midwest, ye una de les cuatro rexones nes que la Oficina del Censu de los Estaos Xuníos divide, con propósitos estadísticos, el territoriu d'Estaos Xuníos[1]. La rexón, nomada oficialmente Rexón Central del Norte (North Central Region) hasta 1984[2], asítiase ente'l Noreste d'Estaos Xuníos y l'Oeste d'Estaos Xuníos, y llenda al norte con Canadá y al sur col Sur d'Estaos Xuníos.
La definición de la Oficina del Censu inclúi nella 12 estaos de la fastera centru-septentrional d'Estaos Xuníos: Dakota del Norte, Dakota del Sur, Illinois, Indiana, Iowa, Kansas, Michigan, Minnesota, Missouri, Nebraska, Ohio y Wisconsin. Xeográficamente la rexón abarca los estaos asitiaos na gran llanada interior esistente ente los montes Apalaches y los Montes Rocosos. Los principales ríos de la rexón son, d'este a oeste, l'Ohio, el Mississippi y el Missouri[3]. La población d'esta rexón en 2012, según la Oficina del Censu, yera de 65.377.684 habitantes. La rexón sodivídese en dos, que tomen como referencia el calce del ríu Mississippi: la División Centru Noreste, qu'inclúi a los estaos asitiaos na vera izquierda del ríu, esto ye, Illinois, Indiana, Michigan, Ohio y Wisconsin, estaos pertenecientes tamién a la rexón de los Grandes Llagos; y la División Centru Noroeste, qu'inclúi a los estaos de la vera derecha del ríu, esto ye, les dos Dakotes, Iowa, Kansas, Minnesota, Missouri y Nebraska.
