María del Carmen Maroto Vela (21 de xunetu de 1938, Granada) ye una médica española, especializada nel campu de la microbioloxía. Ye conocida poles sos investigaciones en microbioloxía y parasitoloxía, cuantimás sobre virus de tresmisión hemática.
Recibió la medaya de plata de la Universidá de Granada nel añu 2000 y foi nomada muyer d'Europa tamién nel añu 2000.
Nació en Madrid nel añu 1938. Estudió los sos primeros años nun colexu de monxes.[2] Llicencióse en medicina y ciruxía pola Universidá Complutense onde se doctoró darréu.[3] Nesti periodu d'estudios conoció al que ye'l so home, Gonzalo Piédrola Angulo, catedráticu de microbioloxía, col que tien trés fíos.[2] Más palantre, foi profesora collaboradora d'esta mesma universidá.
Hai más de trenta años que mora en Granada cola so familia onde, en 1973, foi nomada profesora axunta de microbioloxía y parasitoloxía na Universidá de Granada, de que la so facultá de medicina foi vicedecana y xefa d'estudios. Ente 1980 y 1983 foi profesora amestada numeraria d'esta mesma universidá onde, en 1983, realizó la cátedra na so especialidá. Dirixe los proyeutos d'investigación del comité d'ensayos clínicos del hospital de Granada y ye tamién direutora de beques del FISS y de la xunta d'Andalucía.[4]
Investigó sobre hepatitis A y B, interacciones virales, replicación y tresmisión del virus de la hepatitis B y C, cuantificación de la carga viral, aplicación de les téuniques de bioloxía molecular en distintos virus y estudios de resistencia a antirretrovirus por aciu métodos de secuenciación. Na actualidá trabaya en proyeutos d'investigación sobre co-infeición, S.I.D.A., hepatitis C y sobre la respuesta inmune ya inmunoloxía y bioteunoloxía de los virus de tresmisión hemática.
Miembru de númberu de la Real Academia Nacional de Medicina,[5] foi nomada presidenta en 2004 de la d'Andalucía Oriental, siendo la primer muyer n'ostentar esti cargu nos 267 años d'historia de l'Academia.[6] Ye tamién xuráu nel Premiu Príncipe d'Asturies d'Investigación Científica y Téunica.