Les Islles Márxal[8], oficialmente República de les Islles Márxal, ye una nación que la so independencia en 1986 la convirtió nún de los países más nuevos d'Oceanía. Formó parte del Territoriu en Fideicomisu de les Islles del Pacíficu y tuvo suxetu baxo l'alministración de los Estaos Xuníos, sicasí, pue considerase como un protectoráu d'esti país. Ta compuestu por dos archipiélagos y dalgunos arrecifes qu'en total sumen unes 1.152 islles del Pacíficu. Allúgase al nordeste d'Australia, específicamente al norte de Nauru y al este de Micronesia.
Les Islles Márxal foron colonizaes pel segundu mileniu eC polos micronesios, anque ye bien poco lo que se sabe de la so historia. L’esplorador español Alonso de Salazar foi’l primer europeu n’avistales, pero permanecieron esconocíes dica l'aportada del inglés John Marshall, en 1788. Les islles tomen el nome na so honra.
Na Segunda Guerra Mundial, Estaos Xuníos ocupa les islles en 1944 ya les incorpora al Territoriu en Fideicomisu de les islles del Pacíficu. Ente 1946 y 1957 usa les islles como campu de pruebes nucleares, llegando a entamar 67 detonaciones. La mayor prueba de toes, conocida como Castle Bravo, causó l'envenenamientu d'una parte considerable de población y con efeutos nel mediu ambiente.
En 1976 la República de les Islles Márxal foi establecida con un alcuerdu de llibre asociación que tendría vixencia de magar 1986. En 1990 termina oficialmente’l fideicomisu sobre’l territoriu configurándose como una nación llibre.
Xeografía
Les Islles Márxal asiéntense sobre antiguos volcanes merguyaos que s’eleven dende’l fondu oceánicu. La tierra emerxío como atolones ya islles preséntense en forma de dos grupos: el de Ratak (alborecer) y el de Ralik (atapecer). Les dos cadenes d'islles atópense aproximao paraleles ente sí, corriendo de noroccidente a sureste. Comprenden unos 1.900.000 km² d'océanu pero namás unes 180 km² de tierra.
El país consiste nun total de 29 atolones y cinco islles aisllaes. L’atolón más grande ye’l de Kwajalein.
Organización político-alministrativa
Les Islles Márxal dixébrense alministrativamente en dos distritos: cadena Ralik, al occidente, y cadena Ratak, al oriente. Cada distritu confórmenlu los atolones ya islles enumberaes darréu:
Les Islles Márxal tienen varios aeropuestos pequeños y pistes d'aterrizaxe. Destaca l'Aeropuertu Internacional d'Islles Márxal en Marujo onde operen Air Marshall Islands, United Airlines, Our Airline y Asia Pacific Airlines.
Economía
Les Márxal tienen mui pocos recursos naturales, superando la cifra de les importaciones ampliamente a la de les esportaciones.
La pesca ye un sector importante. En Mayuru allúgase un importante puertu mundial de tresbordu, procesamientu y esportación del bonitu.
La industria esiste en pequeña escala, llendada a artesanía y procesamientu de pescao y copra. El turismu amuesa un mayor espollete nestos caberos años.
En Mayuru ta esperimentándose una alternativa a los combustibles fósiles encontiada nel aceite de copra.
Demografía
D’alcuerdu cola estadística del añu 2003, la población del archipiélagu ascendía a 56.429 habitantes. La esperanza de vida nun supera los 67 años y mediu nos homes nin los 71 años y mediu nes muyeres.
Cultura
Los marxaleses foron espertos navegadores, usando les estrelles y mapes de conches pa la so orientación. Anguaño, eses habilidaes tán en declive.
Tamién nel pasáu tuvo mui presente l'arte del tatuaxe. Por esti motivu, la espedición d'Álvaro de Saavedra que desembarcó nun arrecife al nooeste de les islles apellidóles Islles de los Pintaos y prindaron dellos nativos p'amosalos na Corte española.
_(Polynesia_centered).svg)
