Javier Vallaure de Acha (4 de xunetu de 1949, Hamburgu) ye un diplomáticu español d'orixe asturianu. Dende xunu de 2014, ye Cónsul Xeneral d'España nos Los Angeles (EEXX).
En 1974 llicencióse en Derechu pola Universidá Complutense de Madrid, y en 1979 ingresó na carrera diplomática. Foi Subdireutor Xeneral d'Asuntos Internacionales de Seguridá y Subdireutor Xeneral pal Sureste Asiáticu, Filipines y Asuntos del Pacíficu nel Ministeriu d'Asuntos Esteriores d'España. Tuvo destináu nes embaxaes d'España en Irán, Portugal, Australia y Tunicia. Foi Cónsul Xeneral d'España en Porto Alegre (Brasil) y Miami (EEXX). En 2005 foi designáu Embaxador d'España n'Angola. De setiembre de 2008 a xineru de 2011 foi Introductor d'embaxadores nel Ministeriu d'Asuntos Esteriores y de Cooperación d'España. De 2011 a 2014 foi Embaxador d'España nos Países Baxos. [1] Como Cónsul Xeneral d'España en Miami adquirió notoriedá pola so participación, en representación del gobiernu d'España, na defensa de Joaquín José Martínez, el primer español y européu en salir d'un corredor de la muerte d'Estaos Xuníos en 2001.
Impartió cursos y conferencies sobre política esterior y protocolu en distintes universidaes españoles.
En 2005 foi estremáu col premiu "Avilés Award" de la ciudá de San Agustín (Florida, EEXX).
En 2008 foi-y concedida la Sardina d'Oru[2] pola Fundación Sabugo ¡Tente firme![3] d'Avilés (Asturies).
En 2009 foi-y dada, pola Presidenta de la República Arxentina, la Dra. Dña. Cristina Fernández de Kirchner, la Gran Cruz de la Orde del Llibertador San Martín[4]
En 2010 llogró'l "I Premiu a les Rellaciones Internacionales" dau pel Centru de Desarrollu de Rellaciones internacionales de la Fundación de la Escuela de Negocios d'Asturies Business School[5] en collaboración col Conceyu de Xixón y l'Institutu de Desarrollu Económicu d'Asturies.
En 2017 foi nomáu catedráticu honorariu de Política Esterior y Diplomacia pola Universidá Católica de Murcia.[6]
el 18 de mayu de 2018 foi xubíu a Embaxador d'España.[7]
Ta en posesión de distintes condecoraciones nacionales y estranxeres.