Un enclave ye un territoriu, o parte d'un territoriu, que ta arrodiáu dafechu pel territoriu d'otru estáu[1]. Les agües territoriales tienen los mesmos atributos de soberanía que'l territoriu; poro, pueden esistir tamién enclaves dientro de les agües territoriales[2]. Un exclave ye una parte d'un estáu o un territoriu que ta xeográficamente separtáu del territoriu principal del mesmu por territorios d'otru o otros estaos[3]. Munchos exclaves son, al tiempu, enclaves. El términu enclave ye, delles vegaes, usáu incorreutamente pa dicir qu'un territoriu ta parcialmente rodeáu per otru estáu[1]. La Ciudá del Vaticanu y San Marín, enclavaos por Italia, y Lesotho, enclaváu pola República Sudafricana, son los únicos estaos enclavaos del mundu. A diferencia d'un enclave, un exclave puede tar arrodiáu per territoriu de varios estaos[4] L'exclave azerbaixanu de Naxçıvan ye un exemplu d'exclave.
Los semienclaves y semiexclaves son rexones que, de nun ser porque tienen una llende marina non arrodiada por territorios de dengún otru país, seríen enclaves o exclaves[5]. Los enclaves, como los citaos nel párrafu anterior, y los semienclaves, como Mónacu, Gambia y Brunéi, pueden esistir como estaos independientes, mentantu que los exclaves siempre son namái una parte d'un estáu soberanu[6].
Un penienclave ye una parte del territoriu d'un país a la que namái puede aportarse -especialmente per carretera o ferrocarril- atravesando'l territoriu d'otru estáu[7]. Los penienclaves reciben tamién los nomes d'enclaves funcionales o enclaves práuticos[8]. Pueden ser completamente terrestres, cuando los montes que lu arrodien faen el territoriu inaccesible dende'l restu del país de nun ser que s'aporte a elli al traviés del territoriu d'otru (como asocede en Kleinwalsertar, un valle austriacu accesible namái dende territoriu alemán), o tener una fastera costera, d'agües territoriales propies, pero con accesu rodáu namái dende otru país (Points Roberts (Washington), nos Estaos Xuníos pero con accesu rodáu dende Canadá).