Coordenaes: 7h 16m 49.824s, -67° 57′ 25.748″
Delta Volantis (δ Vol / HD 57623 / HR 2803)[8] ye, con magnitú aparente +3,98, la cuarta estrella más brillosa de la constelación de Volans —el pexe volador— dempués de β Volantis, γ Volantis y ζ Volantis. Alcuéntrase a 738 años lluz del Sistema Solar.
Delta Volantis ye una xigante lluminosa de tipu espectral F6 II con una temperatura superficial averada de 6000 K. Relluma con una lluminosidá igual a la de 2900 soles y, al igual qu'otres estrelles de la so temperatura, presenta cierta actividá magnética. Tien un radiu 50 vegaes más grande que'l radiu solar y la so velocidá de rotación proyeutada —llende inferior del valor real— ye de 12 km/s, dando llugar a un periodu de rotación d'hasta 200 díes —siendo esta cifra una llende cimera—. Nel diagrama de Hertzsprung-Russell tópase asitiada ente Mirfak (α Persei) y Polaris (α Ursae Minoris), cerca de la rexón de les cefeides, anque ella nun amuesa les pulsaciones carauterístiques d'estes variables. Con una edá de 50 millones d'años, tien una masa averada de 6 - 6,5 mases solares. Anque ye difícil concretar el so actual estáu evolutivu, lo que puede asegurase ye que va acabar la so vida como una masiva nana blanca de 1 ~ masa solar.[9]