PROFILBARU.COM

Bugatti
	organización
Llocalización
Sede	Molsheim
Direición	Francia
Forma xurídica	société par actions simplifiée
Historia
Fundación	22 avientu 1998
Organigrama
Dueñu	Bugatti Rimac (en) ; Grupu Volkswagen
Sector
Industria	automobile vehicle manufacturing (en)
Productos destacaos	automóvil deportivu
Participación empresarial
Organización matriz	Bugatti Rimac (en) ; Grupu Volkswagen
Datos económicos
Emplegaos	297 (2016)
Ingresos totales	319 500 000 € (2021)
Beneficiu netu	8 400 000 € (2021)
	Web oficial

Bugatti ye una marca italo-francesa d'automóviles de gran luxu y competición fundada pol italianu Ettore Bugatti (1881-1947) nel añu 1909 en Molsheim, llocalidá anguaño en Francia y daquella perteneciente al Imperiu alemán. Pertenez al Grupu Volkswagen.

Col lema de Nada puede ser demasiáu formosu, nada puede ser demasiáu costosu, la familia Bugatti, Ettore, el so hermanu Rembrandt (escultor de la célebre mascota del Type 41 Royale, l'elefante) y el so fíu Jean (talentosu diseñador y pilotu) diseñaron y construyeron mientres 30 años una serie de luxosos automóviles que destacaron tantu pol so rendimientu como pol so diseñu.

A finales de la Segunda Guerra Mundial la marca, como otres del sector, conoció dificultaes económiques y nun pudo recuperar la rellumanza alcanzada nos años 1920 y 30 pero'l so prestíu caltuvo l'interés por rellanzala como competidora de Maserati o Alfa Romeo mientres los años 1950 y 1960.

Dende los años 1980 esta marca foi xestionada pola empresa Bugatti Automobili SpA qu'adquirió tamién Lotus, hasta qu'en siendo mercada en 1998 pol Grupu Volkswagen, constituyir n'empresa de capital francés nel añu 2000 cola denominación de Bugatti Automobiles SAS con base en Molsheim.

Bugatti ente los dos guerres

En 1912, el Bugatti Type 13 atropó los cuatro primeros llugares nel Gran Premiu de Brescia. Ente 1927 y 1933, Bugatti fabricó seis unidaes del so modelu Type 41 Royale, l'automóvil más luxosu d'aquella dómina, una colosal limusina de 6,4 metros de llargu propulsada por un motor de 12,7 llitros y 300 CV. En 1935, Jean Bugatti presentó'l Type 57, consideráu un finxu na hestoria automotriz. Otros diseños notables incluyeron al Type 57 Atlantic Coupe de 1936. En 1939 la Segunda Guerra Mundial provocó'l zarru de la fábrica, pos los alemanes la confiscaron dempués d'ocupar territoriu francés, obligando a Ettore Bugatti a abellugase n'Italia.

Crisis

Concluyida la Guerra llibró una dura llucha pa recuperar la fábrica. Malapenes un mes dempués de la devolución en 1947, Ettore Bugatti morrió, liquidando toa posibilidá de volver a les glorioses dómines d'antaño. En 1956, llanzóse'l modelu Type 251 siendo ésti un fracasu, significando de camín la quiebra de la empresa; cerrando les sos puertes por un ralu de 35 años.

Resurdimientu italianu

En 1991, Romanu Artioli mercó'l nome de Bugatti (lo único qu'hasta entós quedaba de la marca) ya instaló una fábrica en Módena, Italia. Llanzóse'l EB110, el coche más rápidu de la so dómina, pero'l baxu presupuestu torgó-y a la nueva fábrica ampliar los sos horizontes y tuvo que cerrar nuevamente les sos puertes cuatro años dempués.

Empresa alemana

En 1998, el Grupu Volkswagen mérca-y la marca a Artioli, siguiendo y ampliando l'enclín de crear superdeportivos pero ensin pasar inda de la etapa de prototipu. Esti consorciu estableció una planta en Molsheim, na rexón d'Alsacia, (Francia), llugar onde operó la fábrica orixinal.

Nel Salón del Automóvil de Xinebra de 2002 presentóse'l primer prototipu del automóvil de cai más rápidu del mundu: el Bugatti Veyron EB 16.4, con 7993 centímetros cúbicos, que desenvolvía la velocidá máxima de 406 km/h y aceleraba de 0 a 100 km/h en 3 segundos y de 0 a 300 en menos de 14. El motor d'esti prototipu yera un W16 (16 cilindros en W) de 1.001 CV de potencia. La xente de Bugatti fala d'una producción envalorada de 50 unidaes al añu d'esti superdeportivu, disponible dende 2005, y acepta pidíos al traviés de canales esclusives.

En 2007 Bugatti fabricó 88 unidaes del Veyron. Esta cifra representa un aumentu de 100 % con al respective de 2006 (44 unidaes). En 2008 presentóse la versión descapotable Grand Sport.

A mediaos del añu 2010, Bugatti llanzó l'autu de serie más rápidu y potente del mundu, la versión Super Sport del Bugatti Veyron, col mesmu motor W16 cilindros, pero qu'a diferencia de los anteriores, esta entrega 1.200 CV y algama una velocidá cimera a los 430 km/h, imponiendo un nuevu récor mundial que pondría a la marca francesa a la cabeza tocantes a potencia y velocidá de serie refierse.