En 1946 el ministru d'Asuntos Esternos d'Australia, H.V. Evatt, sofitó una propuesta de Douglas Mawson pa establecer una base permanente d'Australia en L'Antártida.[1] Sicasí, pasaron siete años primero que un barcu fayadizu, el Kista Dan pudo ser fletáu pa establecer instalaciones nel continente austral.
El sitiu pa la base foi escoyíu en 1953 por Phillip Law, primer direutor de la AAD, quien se basó en fotografíes aérees tomaes mientres la Operación Highjump d'Estaos Xuníos (1946-1947) pa escoyer el sitiu pol so gran puertu natural (Horseshoe Harbour) y por ser de roca permanentemente llibre.[1] La estación foi construyida mientres 1954. Dalgunes de les pequeñes cabañes prefabricaes utilizaes nos primeros años entá permanecen na base, pero vense asombraes por grandes edificios modulares d'armazón d'aceru que daten d'un importante programa de reconstrucción qu'empezó a finales de la década de 1970.
