عبلة كامل (8 ديسمبر 1960 -) ممثله مصرية.
اتخرجت من كلية الاداب قسم مكتبات سنة 1984
بداية المشوار
بدا مشوارها فى السينما مع مكتشفها المخرج العالمى جدا يوسف شاهين فى فيلم وداعا بونابرت سنة 1985 و رغم ان الدور كان صغير الا انه شد الانظار اليها وبدات تمشى على طريق المجد ، و بعد كده برضو عملت فيلمها التانى مع يوسف شاهين اليوم السادس ، و بعد كدة طلبتها سيدة الشاشة العربية فاتن حمامة بالاسم فى فيلمها يوم حلو يوم مر
التلفزيون
عملت اعمال تلفزيونية كتير لكن اولها كان ليالى الحلمية مع المؤلف اسامة انور عكاشة و كان دور رقية البدرى فى ليالى الحلمية النقلة الحقيقية فى حياتها والنقاد اشادوا بيها لابعد الحدود ، بعد كدة عملت اعمال كتيرة فى التلفزيون زى لن اعيش فى جلباب ابى مع نور الشريف واخرها كان ريا وسكينة مع سمية الخشاب وصلاح عبد الله
المسرحيات
هى اساسا بتقول عن نفسها انها فنانة مسرح و بالخصوص ان مسرح الجامعة هوه اللى لفت انتباها لدخول عالم الفن بالرغم من ان اسرتها كانت معارضة و كانت اول مسرحية واشهر مسرحية ليها مع محمد صبحى باسم وجهة نظر فى بداية التسعينيات
السينما
لها افلام كثير زى «صراع الاحفاد» مع نور الشريف وصلاح السعدني. وفيلم الفانتازيا «ستاتى أنساتي» للمخرج رأفت الميهي، و«سارق الفرح» مع داوود عبد السيد، واللى عملت فيه شخصية فتاة ليل و سواق الهانم مع احمد زكي. وكلها افلام كانت جامدة . لكن سنة 2002 عملت فيلم «اللمبي» مع للفنان محمد سعد، واللى خلى النقاد ينتقدوها بسبب ان فنانة زيها عملت الدور ده
ازمة بين الاهلى و الزمالك
لكن الفيلم اللى فجر ازمة بين مشجعين الكره فى مصر هوه فيلم سيد العاطفى و بالخصوص ان كان ليها مقطع بييجى على التلفزيون بتقول فيها خدوا سته رايح .. خدوا اربعه جاى لدرجة خلت الصحف الزملكاوية فى مصر تنتقدها بشده
[1]
