ݣرينادا (ب لينݣليزية: Grenada) هي بلاد جات فلجزر د لهند لغربية ف لبحر د لكاريبي. جات ݣرينادا فالشمال لغربي د طرينيضاض ؤ طوباݣو، و 140 كلم على الشمال الشرقي د ڤينيزويلا، و جات تحت (ف لجنوب) ديال لجزر د سانت ڤينسنت و لݣرونادين.[1]
لأصل ديال السمية ديال ݣرينادا هو لمدينة د غرناطة ف صبانيا، و تسمات بيها ف 1498 ملي داز كريسطوف كولومبوس على لمنطقة فالسفر التالت ديالو. ماعمّر الصبليون ما ستعمرو لجزيرة، و كانو لفرانساويين هوما أول أوروپيين اللي ستعمروها ف 1650. ف 10 فبراير 1763، مورا ليتيفاقية ديال باريز عطات فرانسا ݣرينادا لبريطانيا، اللي بقات مستعمراها تال 7 فبراير 1974، اللي هو التاريخ د لإستقلال د لبلاد.
تيسكنو ف ݣرينادا شويا كتر من 100.000 واحد، و لعاصمة ديالها و أكبر مدينة فيها هي سانت جورجز. اللغة الرسمية د لبلاد هي لينݣليزية، و لكن لكريويل د لفرانساوية و ديال لينݣليزية معتارفين بيهم لغات جهوية. لفلوس ديال ݣرينادا هي الدولار د شرق لكاريبي. ݣرينادا تابعة للمنضمة د لكومونويلث و نضام لحكيم فيها هو ملكي، عندو نفس لملك ديال بريطانيا.
عيون لكلام
