Ciudad de México (es)
لمدينة د ميكسيكو (بالصبليونية: Ciudad de México) هي لعاصمة لفيديرالية د لمكسيك و أكبر مدينة فيها. هي لمدينة اللي فيها أكبر عدد د السكان ف أمريكا الشمالية كاملة، و من أكبر لمدون ف لعالم من جيهت عدد السكان (تيسكنو فيها و ف النواحي ديالها تقريبا 22 مليون واحد[1]). لمدينة جات ف وسط لبلاد، على هضبة عالية. لإرتفاع ديالها هو 2240 ميطرو، و مقسومة على 16 لمنطقة.
ميكسيكو هي أقدم عاصمة ف لقارة ديال أميريكا، و وحدا من جوج عواصم اللي بناوهم السكان لأصليين (لاخرا هي كيطو، لعاصمة د لإكواطًور). تبنات ميكسيكو ف 1325 (بناوها لأزطيك و كانت سميتها طينوشتيتلان[2]) و لكن تقريبا تخربات كاملة ف 1521 ملّي كانت حرب باش يدخلوليها الصبليون، اللي عاودو بناوها بالطريقة ديالهم.
لإقتصاد ديال لمدينة ديال ميكسيكو صحيح، و فيه بزاف د الصناعات. ميكسيكو عندها قتصاد كبير لدرجة باللي قدّو قد لإقتصاد ديال پيرو كاملة. لمدينة عندها أكبر ميطرو ف أمريكا اللاتينية (تبنا ف 1969، فيه 12 لخط و 195 محطة)، و أكبر مطار دولي ف أمريكا اللاتينية. لمدينة لقديمة د ميكسيكو داخلة ف اللائحة ديال الترات لعالمي ديال ليونيسكو.