ليبيريا

ليبيريا، رسميا لجمهورية د ليبيريا (بلينݣليزية: Republic of Liberia) هي بلاد جات ف لغرب د إفريقيا. تاتحدّها سييرا ليون من الشمال لغربي، غينيا من الشمال، كوط ديڤوار من الشرق، و لمحيط لأطلسي من لجنوب و لغرب.

التاريخ د ليبيريا مرتابط بزاف ب لبلاصة اللي جات فيها و بلعبودية. من 1820، بداو بزاف د لعبيد اللي تحرّرو ف لميريكان تيرجعو لإفريقيا، و بالضبط لهاد لمنطقة. كانت تاتعاونهم جمعية سميتها جمعية لإستعمار لميريكانية، اللي كانت تاتقول باللي حسن لعبيد يرجعو لإفريقيا على يبقاو ف لميريكان. ملي وصلو بزاف د هاد الناس لإفريقيا، علنو لإستقلال ديال لبلاد اللي أسسو ف 1847، و سمّاوها ليبيريا. هي أول جمهورية علنات لإستقلال ديالها ف إفريقيا كاملة، و خدات الدستور و الراية ديالها من هادوك ديال لميريكان، و عليها كيتشابهو.

من لمشاكل اللي ف لي ليبيريا هي باللي الناس اللي جاو من ميريكان ما تفاهموش مع السكان لأصليين و كانو بزاف د لمدابزات بيناتهم. ف 1980 وقع نقلاب عسكري طيّح لحكام اللي أصلهم من لميريكان، و دخلات لبلاد ف حرب أهلية مات فيها كتر من ربع مليون واحد.^[1] ف 2003 تسينات اتفاقية ديال السلام، و ف 2005 تدارو أول نتخابات ديموقراطية ف لبلاد. الرئيس د ليبيريا من 2018 هو جورج ويا.

تيسكنو ف ليبيريا شويا كتر من 5 د لمليون د الناس، و لعاصمة ديالها هي مونروڤيا. اللغة الرسمية د لبلاد هي لينݣليزية، و عاد كاين كتر من 20 لغة محلية كاتّهضر ولكن ما عندها تا وضع رسمي. لفلوس اللي كاتخدّم هي الدولار الليبيري. هي عضو مؤسس د عصبة لأمم و لأمم لمتحدة و لمنضمة د لوحدة لإفريقية، و داخلة مع بزاف د لمنضمات الدولية بحال ليتيحاد ليفريقي و إيكوواس و لحركة د عدم لإنحياز.