لكاميرون ولاً لجمهورية د لكاميرون (بلفرانساوية: République du Cameroun - بلينݣليزية: Republic of Cameroon) هي واحد لبلاد جات فوسط غرب إفريقيا. تاتحدًها نيجيريا من لغرب، التشاد من الشمال، جمهورية إفريقيا لوسطانية من الشرق، و غينيا ليستيوائية و لݣابون و جمهورية لكونݣو من لجنوب.[1] السمية د لكاميرون جات من لبرتغالية (لقيمرون)، حيث لبرتغاليين كانو أول أوروپيين وصلو تمًا، ولقاو لقيمرون موجود. ف 1884 ستعمرات ألمانيا لكاميرون، ولكن غادي تخليها مورا ماتخسر لحرب لعالمية اللًولا, وغادي يتقاسمو فرانسا وبريطانيا لكاميرون. غادي يستاقل الطرف اللي كان تابع لفرانسا ف 1960 و اللي تابع لبريطانيا ف 1961، وغادي يتوحًدو بجوج فالدولة د لكاميرون اللي كانعرفو دابا.
تيسكنو فلكاميرون شويا كتر من 25 مليون د الناس. لعاصمة ديالها هي ياووندي وأكبر مدينة ولعاصمة ليقتيصادية هي دوالا. لفلوس اللي تاتخدًم فيها هي لفرنك لوسط إفريقي، واللغات الرسمية جوج: لفرانساوية و لينݣليزية. ولكن لكاميرون هي من لبلدان اللي معروفة بالتنوع اللغوي ديالها حيث تيتهضرو فيها كتر من 250 لغة مابين ݣاع لقبايل اللي فيها. لكاميرون جمهورية والرئيس ديالها من 1982 لدابا هو پول بيا.
عيون لكلام
