جزر مارشال، رسميا لجمهورية د جزر مارشال (بلينݣليزية: Republic of the Marshall Islands - بلمارشالية: Aolepān Aorōkin Ṃajeḷ) هي بلاد أرخبيل، جات ف لمحيط لهادي، و تابعة للقارة ديال أوقيانوسيا. أقرب لبلدان ليها هوما كيريباتي و ناورو و ميكرونيزيا. مارشال فيها 1156 جزيرة، و محسوبة على لمجموعة د لجزر د ميكرونيزيا. لجزر د مارشال هي أكتر بلاد ف لعالم من ناحية شحال لمساحة ديالها فيها لما (97.87%).
لجزر د مارشال تسكنات من بنادم تقريبا 2000 عام قبل لميلاد. أول مرة وصلوليها لأوروپيين كانت جوايه 1520، ملّي داز حداها فرناندو ماجلان و مستكشفين صبليون آخرين موراه. تسمّاو لجزر على سميت بحّار د لعسكر د بريطانيا سميتو دجون مارشال، حيت كان هو أوّل واحد رسمهم ف خريطة ما بين الشينوا و ؤسطراليا. أول بلاد حتلات لجزر كانت هي صبانيا، ف 1528، ولكن باعتهم لألمانيا ف 1885. من مورا لحرب لعالمية اللّولا، خدات الجاپون لجزر كاملين من ألمانيا اللي خسرات لحرب. ولكن ف وسط لحرب لعالمية التانية، من مورا ما خسرات الجاپون تا هي، خدات لميريكان لجزر ف 1944 و وجمعاتهم مع لمستعمرات لاخرا ديالها ف لمحيط لهندي. بقات جزر مارشال تابعة للميريكان تال 1979، و هو لعام اللي ستاقلات فيه.
تيسكنو ف لجزر د مارشال شويا كتر من 58.000 د الناس و لعاصمة ديالها هي ماجورو. اللغات الرسمية د لبلاد هوما لينݣليزية و لمارشالية، و لفلوس اللي كاتخدّم هي الدولار لميريكاني. لأغلبية د لإقتصاد د جزر مارشال تيدور على لمعاونة اللي تاتجيها من لميريكان (لملاين د الدولارات كل عام) حيت مخليا فيها قواعد عسكرية ديالها، و تاتخلص تعويضات على التجارب النووية اللي كانت كادّير تمّا.[1]
عيون لكلام
