السودان، (رسميا: لجمهورية د السودان)، هي بلاد جات ف شمال شرق إفريقيا. تايحدّوها من الشمال مصر و ليبيا، من لغرب تشاد، من لجنوب جمهورية وسط إفريقيا، جنوب السودان و إتيوپيا، و من الشرق إيريطيريا و لبحر لحمر. هي تالت أكبر بلاد من ناحية لمساحة ف إفريقيا (مورا لجزائر و جمهورية لكونݣو ديموقراطية)، و تيدوز منها لواد د النيل.
لبلاصة اللي فيها السودان دابا تستعمرات من بريطانيا ف 1898، اللي بقات تمّا تال 1 يناير 1956. قبل من 2011، كانت السودان هي أكبر بلاد ف إفريقيا، ولكن نفاصل منها الطرف لجنوبي ديالها (اللي لأغلبية ديال السكان ديالو مسيحيين و ما تيهضروش لعربية)، اللي ولاّ بلاد جديدة هي "جنوب السودان". لأغلبية ديال السودانيين مسلمين، و من 1983 تال 2020 كانت لقوانين ديال الشريعة تاتطبّق ف لبلاد. ف 2020، ولاّت السودان دولة علمانية.[1]
تيسكنو ف السودان تقريبا 41.5 مليون د الناس، و لعاصمة ديالها هي لخرطوم. اللغة الرسمية ديال لبلاد هي لعربية، و لفلوس اللي كاتخدّم هي لجنيه السوداني. السودان داخلة مع بزاف ديال لمنضمات الدولية بحال لأمم لمتحدة و لجامعة د الدول لعربية و ليتيحاد لإفريقي و منضمة التعاون لإسلامي.
عيون لكلام
