Transporter 2 (títol orichinal en anglés, en aragonés Transportista 2, estrenada en Aragón con o suyo títol orichinal) ye una cinta de cine d'intriga d'acción coproducida por o cine francés, o cine alemán y lo cine estausunidense estrenada l'anyo 2005, dirichida por Louis Leterrier seguntes un guión orichinal de Luc Besson y Robert Mark Kamen (basau en os personaches creyaus por éls mesmos ta la cinta The Transporter), con una banda sonora orichinal d'Alexandre Azaria, una dirección de fotografía de Mitchell Amundsen y una producción cinematografica de Luc Besson y Steve Chasman ta las productoras EuropaCorp, TF1 Films Production, Current Entertainment, Canal+ y TPS Star. Conta con un elenco d'actors d'o cual en fan parte, entre d'atros, Jason Statham, Alessandro Gassmann, Amber Valletta, Kate Nauta, Matthew Modine, Jason Flemyng, Keith David, Hunter Clary, Shannon Briggs, François Berléand, Jeff Chase, AnnaLynne McCord, Tim Ware, Marc Macaulay, Marty Wright y Raymond Tong.
En ista cinta, Frank Martin, o transportista que protagonizaba The Transporter (2002, Corey Yuen y Luis Leterrier) ha marchau a vivir enta Miami (Florida) en os Estaus Unius y ta fer-li un favor a un amigo temporalment transporta a Jack Billings, un nino a qui reculle d'a suya escuela ta levar-lo enta la casa de su mai Audrey. Ha feito una buena amistat con o nino y cuan iste ha de visitar a lo suyo medico s'ufre a tranportar-lo él, encara que heba d'estar en l'Aeropuerto Internacional de Miami a recullir a lo suyo amigo francés, l'inspector Tarconi. Tamién ha refusau los abances d'Audrey, la mai d'o nino, que se troba en un momento difícil d'o suyo matrimonio. Tanimientres, cuan plega en o medico con o nino se troba con un intento de secuestro, que consigue evitar, encara que baixo la menaza de matar a lo nino finalments e veye obligau a entregar-lo a los secuestradors, dirichius por Gianni Chellini. Encara que iste demana 5 millons de dólars como rescate, lo suyo obchectivo real no ye cobrar os diners, so que aproveitar o nino como vehiclo transmisor d'un virus ta que contachie a su pai y iste, a la vegada, contachie a los maximos dirichents mundials d'a luita contra lo trafico de drogas, que han de reunir-se con o pai d'o nino. Frank se veye perseguiu por la policía que lo creye miembro d'os secuestradors a la vegada que ha de perseguir a istos, recuperar o nino y obtener a vacuna contra lo virus, contando nomás que con l'aduya d'o suyo amigo Tarconi, que se troba reteniu en una comisaría de policía.
Transporter 2 fa parte d'a franquicia cinematografica Transporter, estando la segunda cinta dezaga de The Transporter (2002, Corey Yuen y Luis Leterrier) y antes de Transporter 3 (2008, Olivier Megaton) y The Transporter Refueled (2015, Camille Delamarre). S'ambienta en a suya epoca actual (2005) en Miami (Florida) en os Estaus Unius y las suyas escenas se filmoron en Miami y Miami Beach en Florida en os Estaus Unius y en Francia.[2]