La sierra de la Cantera d'el Saso u sierra d'el Saso ye una aliniación montanyosa con dirección NW-SE que fa parte de la unidat morfoestructural dita "serranías marguinals" de lo Sistema Iberico teruelano.[1] Ye un anticlinal cabalgant que desparte la depresión d'Andorra a lo sud y la Chumilla a lo norte, ya en la depresión d'Ebro.
Se troba en la part oriental de la provincia de Teruel entre las comarcas d'Andorra-Sierra d'Arcos y Baixo Aragón. La superficie de la sierra de la Cantera d'el Saso perteneixe a los termins municipals d'Andorra y Alcorisa.
Encara que bel autor la considere como part de lo sector oriental de la sierra d'Arcos,[2] representa un plego de dirección W-E mes vinclau a l'anticlinal de Calanda que a los plegos de la sierra d'Arcos y ye despartida de La Tajonera por materials cenozoicos por a on que pasa lo barranco de Val de Común, que representa una discontinuidat. Antiparte, en la redolada la nombran con un microtoponimo que presenta lo formant chenerico de sierra.
Altarias
La principal altaria ye de 839 m, seguida d'atras como penya de l'Aguila (834 m), cabezo d'el Pinar, y El Saso (787 m), que encara que no siga l'altaria mes gran, da nombre a la sierra y presenta un vértiz cheodesico.
Toponimia
L'oronimo sierra de la Cantera d'el Saso presenta un formant saso recurrent en la toponimia aragonesa y derivau de lo latín SAXUM ("penya").
L'atro formant cantera se torna a trobar en atras zonas de la provincia de Teruel y no necesariament significa "pedrera". En Puertomingalbo la palabra cantera s'emplega pa decir "mont" con lo sentiu de terreno que no se puede treballar agricolament, u tamién especificament como dende a on que s'observa lo terreno, lo que enlaza con lo significau aragonés de cantera como marguin u canto de plataforma.[3] En ansotano se documenta un significau de cantera como "ladera".[4]
L'oronimo completo ye largo y se puede presentar acurzau como sierra d'el Saso u sierra de la Cantera-Saso.
Hidrolochía
Las versants meridional y nordoriental desauguan enta lo río de Calanda dreitament u a traviés de tributarios como lo río Alchozasa, la versant nordoccidental desaugua enta lo Regallo a traviés de barrancos como la Val de Común.
Este zaguer barranco desparte la sierra de la Cantera d'el Saso de La Tajonera a l'ueste y un barranco tributario de lo río de Calanda la desparte de la sierra de la Galga a l'este.
Referencias
- ↑ (es) José Luis Peña Monné et al. : Geomorfología de la Provincia de Teruel. Instituto de Estudios Turolenses, 1984.
- ↑ (es) Juan Leal Pérez-Chao: El paisaje y los ecosistemas de la comarca. Publicau en Comarca de Andorra-Sierra de Arcos, Colección territorio, nº 31. Gubierno d'Aragón, Departamento de Politica Territorial, Chusticia y Interior, 2018. pp 52-53.
- ↑ (es) José Castillo Gil: La toponimia oral de las elevaciones macizas de Puertomingalvo (Gúdar-Javalambre, Aragón) y su rotulación con genéricos postizos a partir del siglo XX. Publicau en Onomàstica. Anuari de la Societat d Onomàstica, nº 2, 2016.
- ↑ (es) Miguel Ánchel Barcos, El Aragonés Ansotano: estudio lingüístico de Ansó y Fago; Gara d'Edizions. Zaragoza, 2007, p 183.
Bibliografía
.jpg)
