Narbona d'Arcal u Narbona de Cenarbe (Cenarbe – 12 de febrero de 1498, Zaragoza) estió una curandera aragonesa d'o sieglo XV procesada y condenada por a Inquisición en 1498 acusada de bruixería.
Acusacions de bruixería
D'Arcal perteneixeba a una familia que poseyeba secretos sobre como manullar plantas y sustancias medicinals,[1] y teneba dos chirmans, Chuan y María (que tamién fuoron acusaus de bruixería).[2] Yera casada con Chuan de Portanya, encara que él l'albandonó y viviba sola mantenindo-se por os suyos medios.
En 1498, un vecín de Cenarbe aseguró que a nieta d'ella heba superau una grieu malautía gracias a las oracions ofreixidas a Sant Cebrián. Poco dimpués d'a suya muerte, atro de su nietos se metió malauto y a suya familia se lamentaba de que ya no vivise ta rezar por él. Manimenos, d'Arcal se feba la mofla d'istas creyencias y recomendó a la familia a curación a traviés de plantas.
A radiz d'iste feito, atros vecins d'o lugar manifestoron haber estau embruixaus por ella causando abortos a mullers d'o lugar, obligando-los a ladrar en a ilesia y mesmo afirmaban que no les permitiba veyer o Santismo Sacramento, veyendo en o suyo puesto una mancha negra cuan a hostia yera alzada en l'altar.[3][4]
Igual que ocurrió con Guirandana de Lai, as acusacions d'os vecins facioron que istas mullers estasen levadas debant d'a chusticia y se charraba d'ellas como as güixas de Villanuga.
Proceso inquisitorial y sentencia
O 12 de febrero de 1498 comenzó o Proceso Inquisitorial contra Cenarbe, que fue chuzgada por os siguients delitos:
"Dize el dicho procurador fiscal que la dicha denunciada, usando del dicho officio de bruxa, ha dado pozonyas a muchas personas y a otras fazía fetillerías y sortilegios, por loqual algunas de las dichas personas morían y otras quedavan baldadas, otras ladravan en la Yglesia y en otras partes como perros y otros animales, y otras vezes estando en la Yglesia no veyan el Corpus quando se alçava y si lo veyan lo veyan muy negro y todo esto prevenía a causa de los fetillos y pozonyas que la dicha demandada ha dado y dava a la[s]dichas personas. Y esto es verdad".[5]
Seguntes o expediente d'o proceso contra Narbona, conservau en l'Archivo Historico Provincial de Zaragoza, ista fue condenada a morir en a foguera por o delito de bruixería,[6] y fue cremada en o palacio de l'Alchafaría.[7]
Referencias
Se veiga tamién
