Edificio d'o Centro Aragonés de Barcelona.
Miguel Ángel Navarro Pérez, naixiu de Zaragoza (Comarca Central, Aragón) o 4 d'octubre de 1883 y muerto en ixa mesma capital o 26 de chinero de 1956, estió un arquitecto aragonés, fillo de l'arquitecto aragonés Félix Navarro Pérez y de Concepción Pérez Michelena. Casau con María Anguela Dolset ye lo pai, entre d'atros fillos, d'o tamién arquitecto Miguel Navarro Anguela, estando a la vegada sobrín de Leandro Navarro Pérez, destacau incheniero agronomo aragonés, que tamién dirichió bellas cintas de cine documental.
Miguel Ángel Navarro Pérez fació los suyos estudios primarios y segundarios en cuantas localidaz espanyolas y en a ciudat francesa de Bayona, estudiando posteriorment Arquitectura en primeras en Madrit ta licenciar-se como arquitecto en a Escuela Tecnica Superior d'Arquitectura de Barcelona. Tamién heba estudiau en a Escuela d'Artes Aplicadas y Oficios Artisticos de Zaragoza y en a Real Academia d'Artes Polidas de San Fernando en Madrit.[2]
Desenrolló la suya carrera profesional por todo Aragón, estando en 1913 arquitecto d'a Cambra de Comercio de Zaragoza y de l'Asociación de Periodistas de Zaragoza, exercindo amás como arquitecto municipal en as localidaz d'Exeya d'os Caballers, Zuera, Tarazona y Calatayú.
Treballó con prochectos arquitectonicos en cuantas localidaz aragonesas (Uesca, Calatayú, Exeya d'os Caballers, Carinyena, Tardienta, Villanueva de Galligo, Zuera, Tarazona, Alfama d'Aragón....) y de fuera d'Aragón, como Sant Sabastián u Valencia.[2] Mientres os anyos 1920 y 1930 estió arquitecto municipal en a ciudat de Zaragoza, estando asinas autor de cuantas actuacions urbanisticas en cuantos barrios d'a ciudat.
Tamién tenió actividat politica, estando dende 1916 dica 1920 concellero y tenient d'alcalde en o Concello de Zaragoza.[2]
Obras destacadas
- Gran Casino d'Alfama d'Aragón (Alfama d'Aragón, Comunidat de Calatayú).[2]
- Palacio de Comunicacions de Valencia (Valencia, País Valenciano).[3]
- Centro Aragonés de Barcelona (Barcelona, Catalunya).
- Grupo Escolar Joaquín Costa (Zaragoza, Comarca Central, Aragón).[4]
- Casa Solans (Zaragoza, Comarca Central, Aragón).[5]
- Teatro d'o Mercau, concebiu orichinalment como mercau de pescau y adaptau anyos dimpués en 1983 como teatro (Zaragoza, Comarca Central, Aragón).
- Teatro d'Artes Polidas de Tarazona (Tarazona, Tarazona y Moncayo, Aragón).
- Colechio Sant Agostín (Zaragoza, Comarca Central, Aragón).[1]
Referencias
- ↑ 1,0 1,1 (es) Historia de la parroquia de Santa Rita de Zaragoza, en a pachina web d'a ilesia de Santa Rita de Casia de Zaragoza.
- ↑ 2,0 2,1 2,2 2,3 (es) Miguel Ángel Navarro Pérez en a pachina web d'a Real Academia de la Historia.
- ↑ (ca) Palau de les Comunicacions, en a pachina web oficial municipal de Valencia.
- ↑ (es) Grupo Escolar Joaquín Costa, en a web d'a Deputación Cheneral d'Aragón.
- ↑ (es) La Casa Solans se abrirá al público los días 16 y 17 de mayo, en El Periódico de Aragón, 20 d'abril de 2009.
Vinclos externos
