Iste articlo ye en proceso de cambio enta la ortografía oficial de Biquipedia (la Ortografía de l'aragonés de l'Academia Aragonesa d'a Luenga). Puez aduyar a completar este proceso revisando l'articlo, fendo-ie los cambios ortograficos necesarios y sacando dimpués ista plantilla.
Frankfurt estió una ciudat estau, a Ciudat Libre de Frankfurt, mientres cuasi cinco sieglos, y estió una d'as ciudaz mas importants d'o Sacro Imperio Romano Chermanico, como puesto de coronacions imperials; perdió a suya sobiranía dimpués d'o colapso de l'imperio en 1806, a recuperó en 1815 y dimpués a tornó a perder en 1866, cuan estió anexada per o Reino de Prusia. Ha estau parti de l'estau de Hessen dende 1945.[1]
Frankfurt ye cultural, etnica y relichiosament diversa, con a metat d'a suya población y a mayoría d'a suya chovenalla d'orichen immigrant. Una cuatrena parti d'a población ye formada per ciudadans foranos.
Frankfurt ye o centro de muitas seus corporativas globals y europeas. Amás, l'aeropuerto de Frankfurt ye lo mas transitau d'Alemanya, un d'os mas transitaus d'Europa y d'o mundo, y lo centro prencipal de Lufthansa, l'aerolinia nacional d'Alemanya.
O toponimo fa referencia a los antigos francos. En a "Cronica de los Conquiridors" s'escribe Franchfruc, Franchort u Franchfurc, amaneixendo en o capítol: Como el rey karles fizo celebrar vn concilio en frachfruc contra elifrando et sus (com)panyones:
Como el Rey karles fizo celebrar vn concilio en franchfu(r)c Contra elifando et s(us)companyones. /Ap(re)s delas cosas sobredichas el Rey karles passando por sabaria fue en gallia et alli fizo aplegar grant concilio de vispos en vn lugar qui ha no(m)bre franchfort contra elifando vispo de toledo en espanya et cont(r)a feliz companyon de aq(ue)l vispo argelaru(n) enlos montes p(ir)ineos...
Cheografía
Barrios
Barrios de Frankfurt d'o Main
La ciudat ye dividida en 46 barrios (Stadtteile), que a la suya vegada se dividen en 121 districtos (Stadtbezirke) y 448 districtos electorals (Wahlbezirke).
Lo barrio d'a ciudat mas gran per población y aria ye Sachsenhausen, mientres que lo mas chicot ye Altstadt, lo centro historico de Frankfurt.
Clima
Frankfurt tien una temperatura meya anyal ye de 10,6 °C, con temperaturas meyas mensuals que van dende os 1,6 °C en chinero dica os 20,0 °C en chulio (datos entre 1981 y 2010).
A resultas d'a suya ubicación en l'extremo norte d'a val de l'Alto Rin en o sudueste d'Alemanya, Frankfurt ye una d'as ciudaz alemanas mas calidas y ixutas de conchunta con con ciudaz como Darmstadt, Mannheim, Karlsruhe y Friburgo de Bresgobia. Os veranos en Frankfurt pueden estar muit calidos, en comparanza con a resta d'o país. Entre os anyos 1981 y 2010 ha habiu 52 días en Frankfurt con una temperatura maxima superior a 25 °C y 13 días con una maxima superior a 30 °C de meya a l'anyo.
En estar una isla de calor urbana, Frankfurt a vegadas se veye afectada per nueiz tropicals, an a temperatura no baixa d'os 20 °C entre mayo y setiembre. Isto ocurre perque a densidat d'a ciudat fa que ista almacene tot a calor.
A temporada de creiximiento ye mas larga en comparanza con a resta d'Alemanya, lo que resulta en una plegada temprana d'a primavera a la rechión.
Os hibiernos en Frankfurt son per un regular templaus con una chicota posibilidat de nieu, especialment en chinero y febrero. Frankfurt ye, en promeyo, cubierta de nieu nomás entre 10 y 20 días per anyo. Beluns días con minimas inferiors a -10 °C pueden ocurrir con mas frecuencia aquí que en as costas d'o norte d'Alemanya, pero no con tanta frecuencia como en Bavera u as partis orientals d'Alemanya.
