Fernando Escartín Coti (Biescas, Uesca, 24 de chinero de 1968) ye un ex-ciclista aragonés.
En os suyos once anyos como profesional estió en tres equipos, o CLAS-Cajastur, que mas tardi cambeó o suyo nombre a Mapei, u Kelme-Costa Blanca, a on estió lo chefe de filas y a on i tenió los suyos grans exitos como corredor profesional, y o Coast, o suyo zaguer equipo dica la suya retirada. En os suyos empecipiallo como corredor estió gregario de Tony Rominger en o Clas-Cajastur.
Fernando Escartín yera ciclista purament escalador (1,75 m y 61 kg), se puede decir que tot lo que ganaba en as etapas de montanya lo perdeba en as etapas contrarreloch ya que no estió un gran contrarrelochista, anque amilloró positivament en as zagueras anyadas d'a suya carrera esportiva consiguindo resultatos mas que acceptables.
Os suyos triunfos mas grans como ciclista profesional estioron en a temporada de 1999, cuan aconsiguió dos d'os suyos prencipals obchectivos: estar en o podio d'a carrera mas important d'o mundo, o Tour de Francia, y ganar a etapa reina d'a carrera francesa d'ixa mesma anyada con final en a estación d'esquí de Piau Engaly. Antimás, estió a suya primera victoria d'etapa en una carrera de tres semanas.
Tamén bi ha que destacar que en a Vuelta a Espanya logró dos segundos puestos (1997 y 1998) y saliba como un d'os favoritos en la edición d'o 1999. Una disgraciata caita baixando lo Puerto d'o Cordal baixo una intensa plevia li obligó a albandonar en ixa edición.
Como triunfos totals logró a cheneral d'a Vuelta a los Valles Mineros, a Vuelta a Aragón en 1995 y a Volta a Catalunya de 1998. Como triunfos parcials ha lograto etapas en a Volta a Galicia, Vuelta a Aragón, Vuelta a los Puertos, Vuelta a Asturies y en o Tour de Francia.
Vinclos externos
