La ermita de Santa María de Chalamera ye una ermita aragonesa d'estilo romanico que se troba en a localidat de Montanyana, en o termin municipal de Puent de Montanyana, comarca de Ribagorza y provincia de Uesca. Dende lo punto d'anvista d'a suya adscripción administrativa en a Ilesia Catolica, pende de l'arcipestrau d'Sobrarbe-Ribagorza en a diocesi de Balbastro-Monzón y de l'archidiocesi de Zaragoza.
Se tracta d'una ermita consagrada a sant Chuan Baptista debantada en os sieglos XII-XIII.[1] Se trobaba en runas, con parti d'a suya nau y l'abside espaldaus dica que se fació una ampla restauración a finals d'os anyos 1990.[2] Se relaciona la suya construcción con a presencia en Montanyana d'a Orden d'o Hespital[3] (por ixo la suya advocación a sant Chuan Baptista, lo patrono d'o hespital fundau por dita orden en Cherusalem). De feito, en l'edificio amanixe una cruz de Cherusalem, simbolo d'a orden.
Descripción
Planta
A planta de l'edificio ye de nomás que una sola nau,[2] con forma rectangular, que remata en un abside semicircular.[4][5] Puet estar que ixe abside sía una adición posterior a la obra inicial.[5]
D'antes más tenió dos capiellas laterals adhibidas con posterioridad a la obra prencipal que fuoron suprimidas posteriorment,[2] cuan a suya restauración.[3]
Frontera
A frontera prencipal d'a ermita poseye cuatre arquivoltas,[5] con refirme en una imposta que a la vegada reposa sobre capitels, que amuestran millor estau de conservación que los de l'amanada ilesia de Ilesia de Nuestra Sinyora de Baldós.[4] En ditos capitels se i troban escenas sobre sant Chuan Baptista, como por eixemplo la degollación[3] u lo baptismo de Chesús).[4] Dencima d'a puerta de dentrada se troba una chicota finestra abocinada.[5]
Poseye una espadanya con triple fano ta ahuespar as suyas campanas.[3]
Tellau
O tellau d'a ermita ye a dos versants, y se troba cubierto por lenastros.[5]
Pinturas
L'interior d'o templo conserva bellas pinturas calendadas a finals d'o sieglo XV u principios d'o sieglo XVI.[1] Ditas pinturas se troboron mientres a restauración d'o templo, amagadas dezaga d'o suyo coro, que en consecuencia desapareixió ta permitir visualizar-las,[5] y son ya en estilo gotico.[3]
Referencias
- ↑ 1,0 1,1 (es) Ermita de Sant Chuan de Montanyana en Montañana medieval.
- ↑ 2,0 2,1 2,2 (es) Ermita de Sant Chuan de Montanyana en www.RománicoAragonés.com.
- ↑ 3,0 3,1 3,2 3,3 3,4 (es) Montanyana en a web Arteguías.
- ↑ 4,0 4,1 4,2 (es) Jaime Cobreros Aguirre: Las rutas del románico en España. Volumen II: Aragón, Cataluña, Navarra, País Vasco y La Rioja, Grupo Anaya, S.A., Madrit, 2004, 1era edición, ISBN 84-9776-112-X, p.217-218.
- ↑ 5,0 5,1 5,2 5,3 5,4 5,5 (es) Ermita de Sant Chuan de Montanyana en a web d'o Sistema de Información del Patrimonio Cultural Aragonés.
Vinclos externos
