Escudo d'a Casa d'Íxar La Casa d'Íxar estió una familia noble d'orichen reyal por haber-se orichinau en Pero Ferrández d'Íxar , fillo de Berenguela Ferrández y de Chaime I d'Aragón , qui lo 20 d'abril de 1268 atorgó a lo suyo fillo la sinyoría d'Íxar . La fundación d'esta sinyoría churisdiccional ye d'alcuerdo con una tradición de los reis d'Aragón que consistiba en creyar infantaus pa los suyos fillos bordes, dando-lis importants beneficios como rendas senyorials, tierras, villas y castiellos. Pero Ferrández , primer sinyor d'Íxar prenió l'apelliu Ferrández d'Íxar por lo toponimo. La casa d'Íxar destacó por la participación en la politica interna y externa de lo Reino d'Aragón , estando present en las campanyas militars de Valencia , Murcia y Sicilia . En 1483 esdevenió que lo sinyor d'Íxar fue nombrau "duque ".
La sinyoría d'Íxar comprendeba los lugars de Íxar , Urreya d'Íxar , La Pobla de Gayén y la Pobla d'Albortón . Lo primer sinyor d'Íxar fundó en lo termin d'Íxar lo lugar de La Pobla de Gayén con moriscos en un puesto dito enantes Gayén .
Pero Ferrández d'Íxar y Gil, segundo sinyor d'Íxar adhibió a la sinyoría la metat de la villa de Belchit y La Pobla d'Albortón .
Chuan Ferrández d'Íxar y Centelles , dito l'Orador, cuatreno sinyor d'Íxar, estió embaixador , consellero y mayordombre d'Alifonso V d'Aragón , y lo "Magnanimo" li donó Binaceit y li vendió Lecera . Alavez la Casa d'Íxar se convertió en una de las casas nobiliarias mes importants d'Aragón.
En 1462 la Bailía d'Aliaga fue ocupada por lo sinyor d'Íxar Chuan Ferrández d'Íxar y Cabrera , partidario de la causa de lo prencipe de Viana . Dimpués lo sinyor d'Íxar se reconcilió con lo rei Chuan II d'Aragón y en recibió lo Condau d'Aliaga y Castellot en 1464 , este condau yera formau por antigas posesions de la Orden de lo Hespital : las localidaz de Castellot , las Cuevas de Canyart , Bordón , Luco de Bordón , Auguaviva , La Chinebrosa , Aliaga , Villarroya de los Pinars , Fortanet , Las Dos Torres de Mercader , Santoleya , Seno , Lo Mas de las Matas y la metat de Nombrevilla . Con esta donación s'entendeba que lo rei se comprometeba a obtener de la Santa Seu la suya confimación. Manimenos cuan morió Chuan II la Casa d'Íxar y los comandadors de la Orden de lo Hespital no yeran d'alcuerdo y dimpués d'un pleito luengo los lugars tornoron a ixa Orden.
Ferrando II d'Aragón compensó a la Casa d'Íxar puyando de categoría a la Baronía d'Íxar , que se convertió en un ducau o 16 d'abril de 1483 , lo Ducau d'Íxar . Dimpués por l'aduya de la Casa d'Íxar en l'afer de Navarra tamién puyó a ducau lo recient creyau Condau d'Aliaga lo 10 d'octubre de 1487 . Manimenos lo suyo hereu no teneba lo títol de Duque d'Íxar (pero si que en yera de Lecera y Aliaga ). En l'anyo 1528 lo rei Carlos I d'Espanya reconoixió como "grans d'Aragón" a ueito casas nobles, entre ellas los Ferrández d'Íxar como contes de Belchit , representaus por Loís Ferrández d'Íxar Arellano , segundo conte de Belchit.
La serie ducal d'Ixar se reanudó con Chuan Francisco Ferrández d'Íxar y Ferrández d'Heredia por autorización de Felipe II d'Espanya en 1599 , y dende él existirá o títol de duque d'Íxar transmeso de cheneración en cheneración. Dende que la cort se quedó fixada en Madrit en 1561 los duques d'Íxar i establioron la suya residencia pa mantener la suya posición y privilechios. Esto fació que en lo ducau quedasen enfortida la posición de los suyos administradors. A la muerte d'este duque lo 13 d'abril de 1614 la suya filla Donya María Estefanía Ferrández d'Íxar y Castro-Pinós . Lo ducau d'Íxar lo heredó breument Donya María Estefanía (1614-1616) y dimpués Donya Isabel Margalida d'Íxar Pinós (1620-1642), casada con Don Rodrigo Sarmiento de Silva Mendoza y Villadrando de la Cerda , III conte de Salinas y Ribadeo, marqués de Alenquer.
En lo reinau de Felipe IV d'Espanya lo cinqueno duque d'Íxar Don Rodrigo Sarmiento de Silva, de Villandrando y de la Cerda se sublevó.
Lo IX Duque d'Íxar Don Joaquín-Diego de Silva Ferrández d'Íxar y Porto-Carrero , Funes de Villalpando (1749-1758) se casó lo 20 de marzo de 1739 con Doña María Engracia, Engracia Abarca de Bolea y Pons de Mendoza , Ximénez d'Urreya y Bermudez de Castro , filla d'o IX Conte d'Aranda Don Buenaventura de Abarca de Bolea . Lo solo fillo d'este matrimonio estió Don Pedro Pablo Alcántara Fadrique , que hederó toz los títols y estaus de los duques d'Íxar y los contes d'Aranda .
