Chuan II d'Aragón (Medina d'o Campo, 29 de chunio de 1398 - †Barcelona, 19 de chinero de 1479) estió Conde de Ribagorza (1425-1458), Rei de Navarra (1425-1479) y Rei d'Aragón, Conde de Barcelona, Rei de Valencia, Rei de Mallorca y Rei de Sicilia (1458-1479).
Yera fillo de Ferrando d'Antequera y de Alionor Urraca de Castiella. Succedió a su chermano Alifonso V en os territorios d'a Corona d'Aragón. En 1419 se casó con Blanca de Navarra estando proclamato rei de Navarra en 1425, anque yera la suya muller quí s'encargaba d'o gubierno de Navarra. Mientres él aduyaba a su chermano con os afers d'a Corona d'Aragón dica la muerte de Alifonso en 1458 cuan fue coronato Rei d'Aragón y d'a resta de territorios d'a Corona, de fueras de Nápols que pasó a mans d'o fillo d'Alifonso, Ferrando I de Nápols. Cuan morió Blanca de Navarra se casó con Chuana Henríquez.
En o suyo reinau habió dos guerras civils en os suyos territorios. A primerá estió a guerra civil en Navarra, an s'enfrontinó a lo suyo primochenito Carlos de Viana en 1452, a quí redotó y desheredó.
A segunda estió a guerra civil catalana (1462-1472) an tenió l'aduya d'o rei Loís XI. Chuan heba de pechar a lo rei de Francia 200.000 doblons d'oro por l'aduya u entregar a Francia a isla de Cerdenya y o Rosellón, como ta rematadera escayeció.
Morió en Barcelona, o 19 de chinero de 1479 y fue enterrato en o Monesterio de Poblet.
Deixó lo Reino de Navarra a la suya filla Alionor de Foix y os territorios d'a Corona d'Aragón a lo suyo fillo Ferrando.
