Dr Schwiizerisch Nazionalfonds isch e Stiftig, wo dr wüsseschaftliche Forschig i dr Schwiiz tuet hälfe.
Dr ganz Name heisst: Schweizerischer Nationalfonds zur Förderung der wissenschaftlichen Forschung. Churz isch es SNF. Uf französisch seit men em Fonds national suisse de la recherche scientifique, uf italiänisch Fondo nazionale svizzero per la ricerca scientifica und uf änglisch Swiss National Science Foundation.
Dr Naturwüsseschaftler Alexander von Muralt (1903–1990) het drmit ane 1952 agfangen und er isch au dr erscht Stiftigspresidänt gsi. Dr SNF isch denn grad e grossi Organisazioon worde, wo für d Forschig uf vilne Fachgebiet vo dr Wüsseschaft wichtig isch. D Stiftig het dr Uftrag vom Bund, d Grundlageforschig z understütze. Si git Gält für Forschigsprojäkt, zahlt junge Wüsseschaftler und Wüsseschaftlerinne Stipändie, si finanziert sogenanti Förderigsprofässuure und hilft speziell de Fraue bin ere wüsseschaftliche Kariere mit de Marie Heim-Vögtlin-Bytreeg; dr SNF maanet do drmit a d Marie Heim-Vögtlin (1845–1916), wo die erschti Ärztin vo dr Schwiiz gsi isch.
Dr SNF hilft den Organisatoore vo wüsseschaftliche Träffe, er zahlt Truckbytreeg für Fachbüecher und luegt au für die internazionali Zämenarbet vo dr Schwiizer Forschig.
Sid 1975 macht dr Schwiizerisch Nazionalfonds zu bsundere Sache eigeti «Nazionali Forschigsprogramm». Es sind Theeme mit ere spezielle gsellschaftliche oder politische Bedüütig, und für die Programm het der SNF amigs en Uftraag von Bundesroot.
Dr Schwiizerisch Nazionalfonds isch so ufgstellt: Es git en Stiftigsroot, der Nazional Forschigsroot mit öppe hundert Fachlüüt us dr Forschig und en Gschäftsstell z Bäärn. Drzue chöme d Forschigskommissioone vo de verschidene Hochschuele vo dr Schwiiz.
Literatur
- 50 Jahre Schweizerischer Nationalfonds zur Förderung der wissenschaftlichen Forschung 1952–2002. Bern 2002.
Weblink
