De Sport-Club Friburg (kurz Sport-Club, SCF oder SC, offiziell Sport-Club Freiburg e. V.) isch e Fueßballverein vu Friburg, wu 1912 entstande isch dur de Zämmeschluss vum Sportverein 04 (grindet am 3. März 1904 als Freiburger FV 04) un Union Freiburg (grindet am 30. Mai 1904 als FC Schwalbe Freiburg). D Herremannschaft vum Sport-Club spilt ab de Saison 2016/17 wider in de 1. Bundesliga. In de „Ewige Bundesligatabelle“ lit de Verein uf em 22. Platz. D Frauemannschaft spilt au in de 1. Bundesliga.
D Vereinsfarwe sin Rot un Wiss. S Woobe het uf de linke Sitte e Kopf vum e Griif un uf de rechte Helfti s Kirzel SCF. Im Oktower 2014 het de Verein 8.200 Mitglider ghet.[1]
De wichtigscht President in de Gschicht vum Sport-Club isch de Achim Stocker gsi, wu vu 1972 ab bis zue sim Dod am 1. November 2009 de Fierigsrige vum Verein aaghert het. Er isch defir bekannt gsi, dass er sich nie Spil vum Verein live aagluegt het zum sin Kraislauf nit z belaschte.
Im eltere Friburger Dialekt het mer zum Verein „de Sport-Club“ gsait, sit dr Verein anne 1993 s erscht Mol in di 1. Bundesliga ufgstige isch un vil Fans dezuegwunne het, sage di meischte Friburger „de SC“.
Gschicht
Vorgängerverein
De Sport-Club isch entstande us zwee Fueßballverein: em Freiburger FV 04 (grindet am 3. März 1904 im Huus "Zum Vater Jahn") un em FC Schwalbe Freiburg (grindet am 30. Mai im Stielinger). Anne 1905 het si de FC Schwalbe in FC Mars umgnennt. Vier Johr speter isch de FC Union Freiburg us em FC Mars uusgrindet wore un de Freiburger FV 04 het sich in Sportverein 04 umgnennt.
De FFV het aafangs uf eme Platz an de Lorettostroß gspiilt, speter am Exerzierplatz. E Aadrag uf e eigene Platz het de Stadtrot im Johr 1907 abglehnt. 1908 het de Verein uf em Gartestadt-Bauglände an de Ginterschdalstroß gspilt, de FC Union Freiburg im Stielinger uf de Eschholzmatte bi de Herz-Jesu-Kilche.
Scho 1905 isch de Freiburger FV in de Verband vu de Sidditsche Fueßballverein ufgnumme un Meischter vu de B-Klasse-Owerrhii wore, e Erfolg, wun er au wider in de Johr 1906 un 1910 gschafft het. 1909 sin de FV 04 un de FC Mars in de Sidditsch Fueßballverband ufgnumme wore.
Am 3. März 1912 hän sich Union Freiburg un de SV 04 zum Sport-Club Freiburg zämmegschlosse. De erscht Vorsitzer isch der Zahnarzt Dr. Rohrer wore.
1912 bis 1945
In de erschte Johr vum Erschte Weltkrieg het s kei Spiil gää. Anne 1918 hän de Freiburger FC un de Sport-Club zämme d Friburger Kriegsmannschaft KSG Freiburg bildet, wu dur e 5:1 gege de SC Stuttgart Sidkreismeischter wore isch.
Am 13. Dezember 1919 het sich de Spot-Club de Freiburger Turnerschaft von 1844 (friejer: Freiburger TV 1844) aagschlosse. Gspilt hän si uf em Messplatz. Im Johr druf sin si Meischter vu de A-Klasse Gau Owerrhii wore un deno in d Kreisliga ufgstige.
1928 sin Fueßballer wider us de FT 1844 uusdrette. Si hän deno mit em Polizeisportverein Freiburg (PSV, grindet 1924) kooperiert un im Stadion vum PSV, em Wintererstadion, gspilt, wu am 1. März iigweit wore isch. Wu de PSV zwei Johr speter zahligsuufähig gsi isch, het de Sport-Club d Schulde vun em iwernumme un ab jetz s Wintererstadion ellei gnutzt.
No de Machtiwernahm vu de Nationalsozialischte 1933 isch de Verein glichgschalte wore un de NSDAP-Stadtrot Ludwig Sieder isch Endi Mai zum Erschte Vorsitzer gwählt wore. D Forderig vu de Stadt noch eme Zämmeschluss vum FFC un em SC het de Verein abglehnt. 1936 het d Stadt em Verein de Verdrag fir s Wintererstadion kindet, wel d Luftwaffe s Gländ brucht het, s Stadion isch deno ei Johr speter abgrisse wore. De Sport-Club het sich 1938 wider de FT 1844 aagschlosse un d Spiil uf em Messplatz uusdrait.
De Sport-Club isch lang im Schatte vum Spitzeverein Friburger FC gstande. Vor de Iifierig vu de Gaulige het de Sport-Club iwerregional ke Roll gspilt. Zur Saison 1933/34 het si de Sport-Club fir di nei Gauliga Bade qualifiziert, isch awer as Tabelleletschte direkt wider abgstige. Vier Meischterschafte in de Bezirksklasse Owerbade vu 1934 bis 1937 hän de Sport-Club viermol in d Ufstigsrundi brocht, wu si de Ufstig awer allmol verbasst hän. Erscht im Zweete Weltkrieg hän d Friburger e baar Mol de Gump in di allmeh versplitteret Gauliga gschafft, ohni dass si awer greßere Erfolg ghet hän.
In de Zit vum Zweete Weltkrieg het s nimi vil Spiil gää, anne 1944 sin Spiil endgiltig iigstellt wore. Bim „Terror“, em Bumbeaagriff uf Friburg am 27. November 1944, sin d Gschäftsstellt un s Clubarchiv im „Ganterbräu“ abbrennt.
1946 bis 1991
Historischs Logo vum Sport-Club (1952 bis 1958)Logo vu 1958 bis 2008
Noch em Krieg het s zerscht emol kei Spiil gää. Am 4. Februar 1946 het s Owerkommando vu de franzesische Besatzigszone schließlig d Gnehmigung gää, dass wider Sportverein hän derfe grindet were. Alli Verein hän de Name mieße ändere, Us em FFC isch Fortuna Freiburg wore, us em FT/SC Freiburg de VfL Freiburg, wu sich fir d Zoneliga Sid qualifiziert het. Vu 1950 bis 1978 hän si in de drittklassige Amateurliga Sidbade gspilt. Anne 1950 het de Verein sich wider in FT/SC Freiburg umgnennt. Ab 1951 het de FT/SC uf eme neie Platz vu de Friburger Durnerschaft an de Schwarzwaldstroß gspilt, em hitige FT-Glände.
Am 27. Juni 1952 sin d Fueßballer wider us de FT uusdrette un hän de hitig Verein Sport-Club Freiburg e. V. bildet. De erscht Vorsitzer isch de Hubert Pfaff wore. Am 6. März 1953 fange d Bauarwete newem Strandbad fir e nei Stadion aa, wu am 4. September 1955 iigweit wird. Zerscht heißt s „SC-Platz“, ab 1967 deno „Dreisamstadion“. 1965 un 1968 het de Sport-Club d Megligkeit ghet, in d Regionalliga Sid ufzstiige, sin awer in de Ufstigsrundi gschitteret.
De Ufstig vum Sport-Club un de Nidergang vum FFC hän mit ere Fehliischetzig aagfange, wu 1972 em FC-Vorstand unterlofe isch: De Leiter vu de Friburger Owerfinanzdirektion, de Achim Stocker, wu selwerscht emol bim Sport-Club in de 1. Mannschaft gspilt ghet het, het em FFC finanzielli Unterstitzig aabote, wel er gueti Beziehige zue potente Geldgewer ghet het. De Vorstand het des awer uusgschlage un de Stocker, wu scho sit 1970 3. Vorsitzer vum Sport-Club gsi isch, isch deno 1. Vorsitzer vum Verein wore. Bis zue sim Dod am 1. November 2009 isch er President vum Sport-Club gsi.
Im Johr 1974 isch de FC in d Amateurliga abgstige. Scho im erschte gmeinsame Johr isch de Sport-Club vor em große Nochber glandet, wu d Liga awer anne 1977 nufzues verlosse het. 1978 isch au de Sport-Club in di 2. Bundesliga ufgstige, wu er di ganz Zitt uf hecheri Tabelleplätz kumme isch wie de FFC. Dää isch 1982 abgstige, de Sport-Club isch im Mittelfeld vu de Zweitligatabelle bliwe un isch siterher de wichtigscht Fueßballverein z Friburg.
Im Jänner 2001 het de Sport-Club au no s traditionell Stadion vum FFC, s Meslistadion, kauft un het dert din d Friburger Fueßballschuel iigrichtet fir d Ferderig vum Noowuchs.
D Ära Finke (1991–2007)
Saison
Liga
Platz
Dor
Pinkt
1991/92
2. Bundesliga Sid
3
41:25
28:16
1992/93
2. Bundesliga
1
102:57
65:27
1993/94
Bundesliga
15
54:57
28:40
1994/95
Bundesliga
3
66:44
46:22
1995/96
Bundesliga
11
30:41
42
1996/97
Bundesliga
17
43:67
29
1997/98
2. Bundesliga
2
57:36
61
1998/99
Bundesliga
12
36:44
39
1999/00
Bundesliga
12
45:50
40
2000/01
Bundesliga
6
54:37
55
2001/02
Bundesliga
16
37:64
30
2002/03
2. Bundesliga
1
58:32
67
2003/04
Bundesliga
13
42:67
38
2004/05
Bundesliga
18
30:75
18
2005/06
2. Bundesliga
4
41:33
56
2006/07
2. Bundesliga
4
55:39
60
grien unterleit: Ufstig in d Bundesliga rot unterleit: Abstig in d 2. Bundesliga
1991 isch de Volker Finke als Trainer verpflichtet wore, wu vum 1. SC Norderstedt kumme isch un vorher 1990 de TSV Havelse bis in di 2. Bundesliga gfiert ghet het. Mit em Stefan Beneking, em Jens Todt un em Thomas Vogel het er au no drei Spiler vu Havelse mitbrocht. Co-Trainer isch de Achim Sarstedt wore. Zue de erschte gsamtditsche Saison isch di 2. Bundesliga in d Stapfle Nord und Sid mit je zwelf Mannschafte ufdeilt wore. Ufgstige in d Bundesliga sin nur di Erschte vu de Tabelle. De Sport-Club het de Ufstig in de Ufstigsrundi awer knapp verbasst, statt dem isch de 1. FC Saarbrücken ufgstige. In de Saison 1992/93 sin d Friburger ab em sibte Spildag uf em erschte Blatz glege un sin deno zum erschte Mol in d Bundesliga ufgstige.
Di erscht Bundesligasaison isch vum Kampf gege de Abstig prägt gsi. De Sport-Club het awer di letschte drei Spil kenne gwinne un isch dodemit dur e besseri Dordifferenz doch no am punktgliche 1. FC Nürnberg verbiizoge.
Noch em knappe Klasseverbliib im erschte Johr isch in de Saison 1994/95 di groß Iwerraschig kumme. Am 2. Spildag het de Sport-Club mit 5:1 gege de FC Bayern München unter em Trainer Giovanni Trapattoni gwunne. Am End vun ere seli starke Saison isch de Sport-Club uf de dritt Platz kumme un het sich demit zum erschte Mol fir de UEFA-Pokal qualifiziert, wu d Friburger awer in de erschte Rundi gege Slavia Prag uusgschide sin. In de Spitzegruppe vu de Liga het sich de Sport-Club awer nit kenne hebe. Vor allem de Weggang vum Spilmacher Rodolfo Esteban Cardoso het nit kenne kumpensiert were. 1997 sin d Friburger wider in di 2. Bundesliga abgstige, sin awer glich no eim Johr wider retour kumme in d Bundesliga un hän sich 2001 wider fir de UEFA-Pokal qualifiziert. No Erfolg gege de slowakisch Vertreter Matador Púchov un de Schwizer FC St. Galle hän si im Dezember 2001 knapp gege de speter UEFA-Pokal-Siger Feyenoord Rotterdam verlore.
In de Liga sin d Fribuirger dewiilscht in di unter Tabellehelfti grutscht. Am End vu de Saison sin si abgstige. 2003 isch de Widerufstig glunge, 2005 sin si awer zum dritte Mol abgstige. In dere Saison hän si nume drei Sig un 18 Pinkt kenne hole un sin dodemit abgschlage uf em letschte Platz glandet. Des isch di schlechtscht Saisonbilanz vun eme Bundesligischte sit de Iifierig vu de Drei-Pinkt-Regle gsii. Im Johr 2006 het de Sport-Club zum erschte Mol de direkt Widerufstig nit gschafft.
D Saison 2006/07 in de 2. Bundesliga het aagfange mit ere schwache Hiirundi. No de 0:4-Niderlag gege de Karlsrueher SC am 16. Spildag het de SC nur 16 Pinkt gholt ghet un isch uf em Tabelleplatz 14 gstande. D Vereinsfierig het deno bekannt gää, dass mit em Trainer Finke zämme ne Trainerwechsel zum Saisonendi 2007 bschlosse wore isch. Dodevor het de Volker Finke awer no de Abstig solle verhindere.[2]
Deno het s e Serie gää mit 13 Spiil ohni Niderlag (elf Siig, zwei Unentschide). De SC isch in de Zwischezitt uf de 4. Platz nufkletteret, dodemit isch de Ufstiig wider nooch gsii. Am End het s awer ganz knapp nit glängt, nume weg de schlechtere Dordifferenz isch de Sport-Club emend uf em 4. Platz bliwe.[2]
Di stark Ruggrundi (mit 41 Pinkt di bescht, wu je ne Verein in de 2. Bundesliga ghet het) isch fir e Deil Fan de Aaloss gsii, di Initiativ „Wir sind Finke“ z grinde. Si het s Ziil ghet, e usserordeligi Mitgliderversammlig z initiiere, wu d Trainerfrog het solle dischpetiere were, ass de Finke doch no z Friburg hätt kenne ghebt were.[3] Des Aalige isch awer fehl gschlage, wel ke 25 % vu de Vereinsmitglider de Aadrag unterstitzt hän, was es briicht hätt fir e usserordeligi Mitgliderversammlig.
Di 16-jehrig Amtszitt vum Trainer Volker Finke isch di bisher lengscht im ditsche Profifueßball. Mit ihm het au de Co-Trainer Achim Sarstedt no 16 Johr de Sport-Club verlosse un de Andreas Bornemann het als SC-Manager ufghert. Au e Deil langjehrigi Stammspiiler hän de Sport-Club verlosse, dodrunter de Aleksandre Iaschwili, de Boubacar Diarra, de Soumaila Coulibaly, de Ibrahim Tanko, de Sascha Riether un de Roda Antar. Unter em Finke het de Sport-Club sii bisher erfolgriichscht Zitt in de Vereinsgschicht ghet.
Gegewart (ab 2007)
Saison
Liga
Platz
Dor
Pinkt
2007/08
2. Bundesliga
5
49:44
55
2008/09
2. Bundesliga
1
60:36
68
2009/10
Bundesliga
14
35:59
35
2010/11
Bundesliga
9
41:50
44
2011/12
Bundesliga
12
45:61
40
2012/13
Bundesliga
5
45:40
51
2013/14
Bundesliga
14
43:61
36
2014/15
Bundesliga
17
36:47
34
2015/16
2. Bundesliga
1
75:39
72
grien unterleit: Ufstig in d Bundesliga rot unterleit: Abstig in d 2. Bundesliga
Neie Scheftrainer isch de Robin Dutt wore, neie Sportdirekter de Dirk Dufner. Au in de erschte Saison unter em neie Trainer het de Verein um de Ufstig mitgspilt, isch awer am End doch nume uf de fimft Platz kumme.
Im Johr 2008 het de Sport-Club e relativ guete Saisonstart ghet. In de erschte siwe Spiil het s fimf Siig bi nume eire Niderlag gää, am End vu de Hiirundi isch er uf Platz drei gstande. Noch ere Serie vu sechs Siig in Folg am Aafang vu de Ruggrundi het de Verein d Tabellespitz iwernumme. Mit eme 5:2-Uuswärtssiig bi de TuS Koblenz hän d Friburger am 31. Spiildag de viert Ufstiig perfekt gmacht. Glichzittig hän si au Zweitliga-Meischterschaft gwunne un sin dodemit au di erscht Mannschaft gsii, wu di nei iigfiert Meischterschale vu de 2. Bundesliga kriegt het.
In de Saison 2009/10 het sich de Sport-Club dur e 2:2 bim 1. FC Köln am 33. Spiildag vorzittig de Klasseerhalt gsicheret un isch in de Abschlusstabelle mit 35 Pinkt uf Rang 14 gstande. D Saison 2010/11 isch fir de Sport-Club relativ erfolgrich verloffe, am End isch er uf em niinte Platz gsii.
Scho vor em Saisonend het de Robin Dutt bekannt gää, ass er am Aafang vu de negschte Saison as Noofolger vum Jupp Heynckes Trainer bi Bayer 04 Leverkusen wird. As Noofolger sin de Marcus Sorg un de Christian Streich vorgstellt wore. Am 10. September 2011 het de Sport-Club unter em Trainer Sorg di hegscht Bundesliganiderlag vu de Vereinsgschicht kassiert: d Friburger hän uuswärts bim FC Bayern München mit 0:7 verlore. Wäg de problematische Situation in der Winterpaus (18. un dodemit letschte Platz) het de Sport-Club bekannt gää, ass fimf Spiiler grote wore sei de Verein z wechsle, wel de Trainer Sorg ohni si plani. Bedroffe sin de Maximilian Nicu, de Manuel Salz, de Felix Bastians, de Kishō Yano un de langjehrig Kapitän Heiko Butscher gsii. E weng speter het de Sport-Club bekannt gää, ass de Sorg mit sofortiger Wirkig vu allene Ämter entbunde sei. Zum erschte Mol in sire Bundesligazitt het sich de Sport-Club vun eme Cheftrainer drennt.[4]
As Noofolger fir de Marcus Sorg isch de bisherig Co-Trainer Christian Streich vorgstellt wore. In de Winterpaus het sich de Spüort-Club vum Papiss Demba Cissé drennt, wu zue Newcastle United gwechlset isch.[5] Unter em Streich het sich Firburg stark kenne verbessere un scho am 32. Spiildag het de Klasseerhalt dur e 0:0 gege Hannover 96 kenne gsicheret were.[6] In de Ruggrundi 2012 hän d Friburger 27 Pinkt gholt ghet, hän ke Heimspiil verlore un sin 10 Spiil in Folg uubesiigt bliwe.
Au in de Saison 2012/13 het de Erfolg aaghebt, in de Winterpaus isch de Verein iwerraschend uf em 5. Platz gstande. In de Ruggrundi het sich de Sport-Club in de owere Tabellehelfti kenne hewe. Au im DFB-Pokal sin d Friburger erfolgriich gsii un sin zum erschte Mol in de Vereinsgschicht dur Uuwärtssiig gege Eintracht Braunschweig, de Karlsrueher SC un de 1. FSV Mainz 05 bis in s Pokal-Halbfinale kumme,[7] wu si awer em VfB Stuttgart uuswärts mit 1:2 unterlege sin.
Am 22. April 2013 het sich de Sport-Club no fascht segs Johr vum Sportdirekter Dirk Dufner drennt, Noofolger sin de Jochen Saier un de Klemens Hartenbach vu de Friburger Fueßballschuel wore.[8] Am 10. Mai het de Christian Streich si Verdrag, wu no bis 2014 gloffe isch, „langfrischtig“ verlängeret.[9]
Am letschte Spiildag vu de Saison 2012/13 het de Verein si Heimspiil gege de FC Schalke 04 verlore un het dodemit as Fimftplatzierte knapp d Deilnahm an de Champions-League-Qualifikation verbasst. Wel de DFB-Pokalsiiger FC Bayern München as Meischter scho fir d UEFA Champions League qualifiziert gsii isch, het sich de Sport-Club direkt fir d Gruppephas vu de UEFA Europa League qualifiziert. No de erfolgriiche Saison sin e baar Spiiler vu andere Verein abgworwe wore: de Jan Rosenthal, de Johannes Flum, de Daniel Caligiuri, de Max Kruse un de Cédric Makiadi. Dur de Klasseerhalt isch de Sport-Club zum erschte Mol uf si fimfti Bundesligasaison in Folg kumme.
In de Saison 2013/14 het ma gmerkt, ass e Huffe Spiiler de Verein verlosse hän un ass de Sport-Club mit de Bundesliga, em Pokal un de UEFA Europa League dreifach belaschtet gsii isch. Ab em 4. Spiildag sin d Friburger nimi us de Abstiigszone nuskumme. Us de Europa Europa League sin si mit segs Pinkt uf Rang drei us em Wettbewerb uusgschide, im DFB-Pokal sin si awer bis in s Achtelfinale kumme, wu si gege Bayer 04 Leverkusen nusgheit sin. Am 32. Spiildag het sich de Sport-Club weg ere 1:3-Uuswärtsniderlag vum Hamburger SV bim FC Augschburg vorzitig de Klasseerhalt gsicheret.
D Hiirundi vu de Saison 2014/15 isch fir d Friburger wenig erfolgriich gloffe, in de Winterpaus sin si uf em letschte Tabelleplatz gstande. In der Ruggrundi hän si ne weng besser gspiilt, awer au ne Siig gege de FC Bayern München am vorletschte Spiildag het ene nit gnutzt: dur d Niderlag gege Hannover am letschte Spiildag isch de Sport-Club no uf de vorletscht Platz nabgrutscht un isch no segs Johr in de Bundesliga abgstige. Des het wider zue me Abgang vu Spiiler gfiert: de Roman Bürki, de Vladimír Darida, de Felix Klaus, de Admir Mehmedi, de Sascha Riether, de Oliver Sorg un de Jonathan Schmid sin zue Erschtligeverein gwechslet.
In de Saison 2015/16 het si de Sort-Club am 32. Spildag de Widerufstig in di 1. Bundesliga noch eme 1:2 Uuswärtssig gege de SC Paderborn 07 gsicheret. Am 33. Spildag isch d Mannschaft dur e 2:0-Sig gege de 1. FC Hoidna zum vierte Mol Maischter vu de 2. Fueßball-Bundesliga wore.
Heimstadion vum Sport-Club isch sit 1954 s Schwarzwald-Stadion mit 24.000 Plätz, dodevu 12.000 Sitzplätz. Bis Juni 2004 het s Stadion de Name Dreisamstadion drait, vu dert aa bis im Dezember 2011 badenova Stadion noch em Energiversorger badenova, vu Jänner 2012 bis Mitti 2014 Mage Solar Stadion, kurzi Zitt Stadion an der Schwarzwaldstraße un sitt em Spotjohr 2014 de jetzig Namme. S Stadion lit im eschtlige Stadtbezirk 310 Waldsee an de Schwarzwaldstroß. D Aalag isch erscht 1970 mit 480 Sitzplätz uusgstattet wore, voreb acht Johr speter – noch em Ufstiig in di 2. Bundesliga – de erscht groß Uusbau kumme isch. Wu de Volker Finke Trainer wore isch, het s Stadion e Kapazität vu rund 12.500 Zueschauer ghet. In de 1980er Johr sin menkmol grad 2000 Lit zue de Heimspiil in de 2. Liga kumme, Friburg het nit als Fueßballstadt gulte. In de Ära Finke het e bemerkenswerte Zueschauerboom iigsetzt un s Stadion isch iwer mehreri Spilzitte immer uusverkauft gsi, sogar no, wu d Kapazität uf di hitige 24.000 kumme isch.
Vor 1928 het de Sport-Club ke eige Stadion ghet. D Spiil sin im Lauf vu de Johr an verschidene Plätz in de Stadt uusdrait wore, an de Lorettostroß, am Exezierplatz, an de Ginterschdalstroß, uf de Eschholzmatte. Wu si sich anne 1919 de Freiburger Turnerschaft von 1844 aagschlosose hän, hän si uf em Messplatz gspiilt.
Ab Merz 1928 hän d Fueßballer vum Sport-Club im neie Winterer-Stadion gspiilt (bis anne 1930 no zämme mit em Polizeisportverein Freiburg, PSV). 1936 het d Stadt em Verein de Verdrag fir s Stadion kindet. Wu si de Sport-Club zwei Johr speter wider de FT 1844 aagschlosse ghet het, sin d Spiil wider uf em Messplatz uusdrait wore.
Ab 1951 het de FT/SC uf eme neie Platz vu de Friburger Durnerschaft an de Schwarzwaldstroß gspilt, em hitige FT-Glände un am 4. September 1955 isch an de Schwarzwaldstroß s nei Stadion iigweit wore, s hitig Schwarzwald-Stadion.
Wel s Schwarzwald-Stadion kuum no de Aaforderige an e modern Stadion entspricht, sin megligi Standort fir e nei Stadion gsuecht wore. In ere Machbarkeitsstudie sin insgsamt zeh Standort uf em Bann vu de Stadt uf ihri Eignig untersuecht wore. Am 25. Februar 2014 het de Friburger Gmeirot mit 35 Jo-Stimme vu 45 meglige Stimme fir e verdiefti Untersuechig vum Standort „Wolfswinkel“ un e Burgerentscheid gstimmt. Am 1. Februar 2015 hän d Burger vu Friburg schließlig mit 58,2 % fir de Stadionneibau im Wolfswinkel gstimmt.
D Amateur vu de zwoote Mannschaft un d Fraue spile im Meslistadion, wu am 1. Oktower 1922 iigweit wore un bis 2000 d Spiilstätt vum Friburger FC gsii isch.
Vereinslieder
Vor de Heimspil vum Sport-Club singe d Fan traditionell s Badnerlied, wie s au bi andere badische Fueßballverein gängig isch.
Blister – Was auch geschieht (Gwinner vum SC-Fansong-Wettbewerb 2006)
Fisherman's Fall – SC Freiburg vor! (2008, aktuelle Fansong, wird vor jedem Heimspil gsunge)
Literatur
Clemens Geißler: 111 Gründe, den SC Freiburg zu lieben. Schwarzkopf & Schwarzkopf Verlag, 2013.
Alex Grömminger: Sportclub Freiburg live. Die Saison 1994/95: Vom Klassenerhalt in den Uefa-Cup, rsg. Alex Grömminger un Sportclub Freiburg, Freiburg 1996. ISBN 3000001034.
Christoph Herko: Ohne Schiri habt ihr keine Chance. Die besten Fan-Gesänge zum SC Freiburg. Freiburg 2000. ISBN 3933483239.
Robert Kauer (Hrsg.): Phänomen Freiburg 1 – Der Aufstieg. Freiburg 1993; Phänomen Freiburg 2 – Eine unendliche Geschichte. Freiburg 1994; Phänomen Freiburg 3 – Mitten in Europa. Freiburg 1995.
Horst Maikranz: Nasenleim für den SC Freiburg. Kinderbuech. Freiburg 1998. ISBN 3980599132.
Gilles Mebes: Der SC Freiburg und der Ernst des Lebens, Freiburg 1999 (ISBN 3-933483-18-2.
Toni Nachbar und Otto Schnekenburger: SC Freiburg - Der lange Weg zum kurzen Pass. Göttingen 2002. ISBN 3-89533-335-2.
Dietrich zur Nedden(Hrsg.): Das Freiburger-Fieber; ein Lesebuch zm SC Freiburg, Frankfurt am Main, Simaden 1995 (ISBN 3927515493).
Marc Rebstock und Jörg Saalmüller: Der 12. Mann. Die Fußballfans des SC Freiburg, Oberried 1996 (ISBN 3931992012).
Sport-Club Freiburg (Hrsg.): Hundert Jahre 90 Minuten: Die Geschichte des SC Freiburg von 1904-2004. Dokumentation: Peter Martin. Freiburg 2004.
Dä Artikel basiert uff ere fräie Übersetzig vu dere Version vum Artikel „SC_Freiburg“ vu de dütsche Wikipedia. E Liste vu de Autore un Versione isch do z finde.
Strategi Solo vs Squad di Free Fire: Cara Menang Mudah!
.svg){kind=small}
