PROFILBARU.COM

Dialäkt: Baseldütsch

Dr Rolf Rappaz (* 9. Septämber 1914 z Baasel; † 9. Januar 1996 z Baasel) isch e Schwizer Grafiker und Künstler vom Konstruktivismus gsi.

Lääben und Wärk

Dr Rappaz het e Leer as grafische Entwärfer gmacht, isch denn uf d Kunstgwärbeschuel Baasel gange, jet an dr Bariiser Académie de la Grande Chaumière studiert und denn vo 1939 aa mit vil Erfolg e grafischs Ateliee gfüert. 1938 isch er e Gründigsmitgliid vom Verband vo de Schwizer Grafiker (Ortsgrubbe Baasel) worde und het vo 1942 bis 1945 as Fachleerer für Grafik an dr Gwärbschuel Baasel Underricht gee, won er e ganzi Generazioon vo junge Kunstschaffende, drunder d Eva Aeppli und dr Jean Tinguely beiiflusst het. In de 1960er Joor het dr Rappaz si Bruef as Wärbigsgrafiker ufgee und sich usschliesslig dr freie Kunst afo widme.

Grafik

Dr Rappaz isch äine vo de erste sälbständige Grafiker gsi und het dr berüemt Schwizer Grafikstil vo dr Noochchriegszit noochhaltig ghulfe z brääge. Er het sich uf Blakatwärbig und Mässbaute spezialisiert und het Aarbede für Firestone, Avia, die Schwizerischi Landesustellig, die Schwizerischi Reederei, d Mustermäss Baasel und Teggstilfirme wie Stoffel z Mels, Fischbacher z Sanggalle und Rohner z Balgach gmacht, wo sich dur e klare, iigängige Stil uszäichnet häi und wo din persönlige Bildwitz sich mit globaler Verständlikäit vermischt. 1945 isch s Blakaat vom Rappaz „Aufschwung“ für d Baasler Mustermäss vom Äidgenössische Departemänt vom Innere zum „Schwizer Blakaat vom Joor“ gweelt worde.

Kunst

S künstlerische Wärk vom Rappaz isch vom Konstruktivismus brägt und ghöört zur Richdig Konkreti Kunst. S Brinzip vo sim Schaffe isch d Permutazioon: Dr Rappaz nimmt usenander, verduscht und kombiniert und macht so us de geometrische Grundforme (Kräis, Vieregg und Dreiegg) und de drei Brimäärfarbe (Root, Blau, Gääl) in Äinzel- und Wäggselbilder, Bildserie und Blastike e Vilfalt vo überraschende Konfigurazioonen. Si künstlerischs Schaffe isch 1972 in ere Usstellig in dr Kunsthalle Bärn gwürdigt worde.

Sini Wärk si hüte im RappazMuseum z Baasel usgstellt.