De Ostschwizer Martin Ulrich isch z Abtwil, as mittlere vo drü Brüedere, in ere musikalische Familie ufgwachse.[2] Scho as Chind isch sis Giige- und Klavierspiil und sis musikalische Inträsse gförderet worde. Churz noch em Abschluss vo de Uusbildig zum Primarlehrer hät er sich entschide, d Musig zu sim Bruef z mache. Sis künstlerische Schaffe goht vo klassische Gsangselemänt bis ane zu rhythmischem Beatboxe. Er isch as Komponist för sini aigne Programm aber au för Film, Schauspiil, Zirkus und anderi Musigprojekt tätig.[3] Z Appezöll, gründet (2001[2]) 2007 z Sanggalle,[4] betribt er sini Firma «Stimmart GmbH».[5] Er hät ab 2010 för fööf Johr z Gääss gwohnt. Sit 2015 läbt er mit sinnere Partneri und em Töchterli z Sanggalle.[1]
Künstlerischi Laufbahn
Als Mitgliid vo de A-cappella-Gruppe «hop o’my’thumb» isch de Martin Ulrich während es paar Johr uf de Bühni im In- und Ussland underwägs gsi. Noch däne erfolgriiche gmainsame Johr hät sich die Gruppe 2006 ufglöst und sich vo de Bühni verabschidet. Vo 2006 bis 2011 isch er musikalische Laiter vom «Hitzige Appezöller Chor» gsi.[6]
Sit 2007 isch de Martin Ulrich as Martin O. underwägs und es isch sis erscht Soloprogramm «Stimmentänzer» entstande. 2011 chunnt s «Cosmophon» dezue und sit März 2016 gastiert er au mit sim dritte Bühneprogramm «Der Mausiker».[7] De Martin O. verwandlet sini Stimme mit Hilf vo sim «Symphonium»,[8] es Loop-Grät, wo kunstvoll i appezäller Nussbomholz iigschaffed worden isch, in es Orchester samt Chor.
