Dr Karlmann (* öbbe 830; † 29. September 880 z Altötting) us dr Familie vo de Karolinger isch vo 876 bis 880 dr König vom Ostfrankeriich und vo 877 bis 879 König vo Italie gsi.
Er isch dr eltist Sohn vom König Ludwig em Dütsche und dr Hemma, dr Dochter vom Graf Welf, gsi.
Bi dr Riichsdeilig vo siim Vater 865 het er dr Titel dux (Herzog) vom ostfränkische Deilriich Bayre übercho. Noch däm siim Dod 876 het er as König vom Ostfrankeriich gherrscht.
Er isch au vo 877 bis 879 dr Nochfolger vo siim Unggle, em westfränkische König Karl dr Kahli, as König vo Italie gsi.
877 het er z Altötting e Chorherrestift gründet, wo dur Schänkige bald sehr wohlhabend worden isch, und het d Stiftschille baut.
Die geographischi Lag vo siiner Königspfalz isch für e Karlmann au dorum günstig gsi, wil er no die italiänischi Königschrone gerbt het. Won er es ziitlilang z Verona gsi isch, isch er schwer chrank worde, isch noch Ötting zrugg und isch dört im Johr 880 gstorbe. Er isch in dr Stiftschille Altötting begrabe.
879, won er scho nüm het chönne regiere, het er Italie siim Brueder Karl III. em Dicke, wo im alemannische Deilriich gherrscht het, ge. Noch em Karlmann siim Dod het si Brueder Ludwig III. dr Jüngeri, wo in Franke, Sachse, Bayre und dr Helfti vo Lothringe gherrscht het, dr Räst vo Lothringe übercho. Im Karlmann si Sohn, dr Arnulf het Kärnte gerbt.
Noch dr hauptsächlig westfränkische Historiographii[1] isch dr Arnulf ere unehelige Verbindig vom Karlmann und dr Liutswind, mögligerwiis ere Schwöster vom Nordgaugraf Ernst, entstammt. Noch em Arnulf siiner Geburt öbbe 850 het dr Karlmann (vor 861) e Dochter, wo me dr Name von ere nit kennt, vo däm Graf Ernst ghürotet. Die isch noch em 8. August 879 gstorbe. Me cha aber nit usschliesse, ass es sich bei dene zwei Fraue um die gliichi Person handlet.[2]