Dr Karl Friedrich Müller (* 25. Februar 1902 z Neistadt; † 10. Dezämber 1983 z Fryybeg isch e dytsche Sprochwisseschaftler, Dialäktforscher un Lehrer gsii.
Dr Müller isch as Suhn vun eme Beamte z Charlsrue, z Ämmedinge un z Fryybeg ufgwagse. Ab 1920 het er an dr Universitet Fryybeg Gschicht un dytschi un franzesischi Philologi studiert. 1921 isch er Mitgliidd vum Fryburger Wingolf wore. Anne 1925 het er syy Studium abgschlosse mit ere gschichtswisseschaftlige Dissertation mit em Titel „Geschichte der Getreidehandelspolitik, des Bäcker- und Müllergewerbes der Stadt Freiburg i. Br. im 14., 15. und 16. Jahrhundert“.
Noch em Staatsexame het dr Müller vu 1927 bis in d 1960er Johr as Lehrer an verschidene Schuele z Bade un im Elsass gschafft, nume unterbroche vu aim Johr, wun er im Chrieg gsii isch un ere churze Zyt noch em Chrieg (1946 bis 1948), wun er as freiwillige Mitarbater am Badische Werterbuech gschafft het. Scho as Studänt het er Matrial fir s Badisch Werterbuech yygschickt un speter au as Lehrer an syne Schuelort gsammlet.
Anne 1961 isch dr Karl Friedrich Müller Noofolger vum Ernst Ochs as Laiter vum Badische Werterbuech wore un dodermit Akademische Oberrot wore. Är het vum zweet Band d Liiferige 28-32 verfasst (Stichwerter „Heidengeschäft“ bis „Holderweg“.
Schwärpinkt vu syre Sproch- un Dialäktforschig sin Näme, Flurnäme un d Dialäktliteratur gsii. Näbe syre wisseschaftlige Arbet het er im Moritz Schauenburg Verlag, wu au s Badisch Werterbeuch erschine isch, d Silberdistel-Reihe mit Prosa un Lyrik vu Dichter und Schriftsteller us em oberrhynische Ruum uusegee, dodrunter au ne Hufe Bänd in alemannische Dialäkt.
No syre Pensionierig anne 1968 isch er z Fryybeg bliibe. Dr Müller isch am 10. Dezämber 1983 z Fryybeg gstorbe, an nämlige Dag, wun er in e Altehaim umzogen isch. Är isch uf em Fryybeger Hauptfridhof begrabe.