Dr Henry James Brydges, 1. Duke of Chandos, PC (* 6. Januar 1673 z Dewsall, Herefordshire; † 9. August 1744 z Canons, Whitchurch, Middlesex) isch e britische Aadlige, Bauheer und Mezeen gsi.
Dr Brydges het as Musterbild vom korrupte, ummoralische Aadlige us em 18. Joorhundert gulte, wo d Bracht gliebt und d Künst gförderet het. Er isch im Schatte vom Marlborough enorm riich worde und het für sich äins vo de brächdigste Heerehüüser z Ängland lo baue. Sini Zitgenosse häi gsäit, ass zu sine beste Zite si ufwändig Lääbensstil däm vom ene dütsche Kurfürst entsproche häig und häi em dorum "The Princely Chandos" (dr fürstligi Chandos) gsäit. Aber so schnäll wie si Stärn ufgstiige isch, so schnäll isch er wider verlosche. Dr Jonathan Swift het 1734 gschriibe: "Was er dur Betrueg erworbe het, het er dur Akzie verloore.". Zum sini Schulde abzaale, isch noch sim Dood si Residänz Canons abgrisse und s Baumaterial verstäigeret worde.
Dr Chandos isch e Patron und Förderer vom Komponist Georg Friedrich Händel gsi, und si Naame isch dank em Händel sine Chandos Anthems unstärblig worde.